پیر , 23 اپریل 2018

امریکی صدر ٹرمپ کا ایران پر نئی پابندیاں عائد کرنے پر غور

واشنگٹن(مانیٹرنگ ڈیسک) امریکی وزیر خزانہ سٹیو منچن نے کہا ہے کہ انھیں توقع ہے کہ صدر ڈونلڈ ٹرمپ ایران پر نئی پابندیاں عائد کریں گے۔ امریکی وزیر خزانہ نے صحافیوں سے بات کرتے ہوئے کہا کہ انھیں توقع ہے کہ ایران پر نئی پابندیوں کا اعلان کیا جائے گا. ماضی میں سامنے آنے والی رپورٹس میں ان پابندیوں کے تحت ایران کی انفرادی شخصیات اور کاروبار کو ہدف بنایا جائے گا۔ ہماری ان پر نظر رہے گی اور میرے خیال میں آپ توقع رکھیں کہ مزید پابندیاں لگائی جا رہی ہیں۔ اس سے پہلے برطانیہ کے وزیرِ خارجہ بورس جانسن نے امریکہ کو چیلنج کیا ہے کہ وہ ایران کے جوہری پروگرام کو محدود کرنے کے موجودہ معاہدے سے بہتر متبادل لا کر دکھائے۔
برسلز میں ایران اور یورپی اتحاد کے اپنے ہم عصروں کے ساتھ مذاکرات کے بعد انھوں نے کہا کہ 2015 میں ہونے والا معاہدہ ایران کو جوہری ہتھیاروں کے حصول سے روکنے کے لیے ایک بڑی کامیابی تھی اور ایران اس پر مکمل طور پر عمل کر رہا ہے۔ امریکی صدر ڈونلڈ ٹرمپ کے مطابق وہ ایران سے جوہری معاہدے میں ترمیم کرنا چاہتے ہیں یا اس سے مکمل طور پر دستبردار ہونا چاہتے ہیں۔
امریکی صدر نے اکتوبر میں انھوں نے کانگریس کے لیے اس بات کی از سرِ نو تصدیق کرنے سے انکار دیا تھا کہ ایران معاہدے کی پاسداری کر رہا ہے۔ انھوں نے الزام لگایا کہ تہران معاہدے کی روح کے مطابق نہیں چل رہا۔ اقتصادی پابندیوں نے ایران کے مرکزی بینک کو بین الاقوامی اقتصادی نظام سے الگ کر دیا تھا اور دوسرے ممالک کی کمپنیوں کے ایران سے تیل خریدنے پر جرمانے لگائے گئے تھے جس کی وجہ سے ایران کی معیشت تباہ ہو رہی تھی۔
جمعرات کو ایران کے وزیرِ خارجہ جواد ظریف سے ملنے کے بعد یورپی اتحاد، برطانیہ، فرانس اور جرمنی نے ایران کے ساتھ جوہری معاہدے کی حمایت کو دہرایا جس کے طے پانے میں انکا بھی ہاتھ تھا۔ یورپی اتحاد کی خارجہ پالیسی کی سربراہ فیڈریکا موگرینی کہتی ہیں کہ معاہدے پر عمل ہو رہا ہے جس کا مطلب ہے کہ ایران کا جوہری پروگرام کنٹرول میں ہے اور اس کی سخت نگرانی کی جا رہی ہے۔
ان کا کہنا تھا کہ جس معاہدے پر عمل ہو رہا ہے جو دنیا کو محفوظ بنا رہا ہے اور جو خطے میں ممکنہ جوہری اسلحے کی دوڑ کو روک رہا ہے اس کو بچانے کے لیے بین الاقوامی برادری کا اتحاد ضروری ہے۔

یہ بھی دیکھیں

بھارت میں بچوں کے ساتھ زیادتی کے مجرموں کو سزائے موت کی منظوری

نئی دہلی (مانیٹرنگ ڈیسک)بھارت میں کابینہ نے چائلڈ پروٹیکشن قانون میں ترمیم کرتے ہوئے بچوں ...