منگل , 11 دسمبر 2018

شام پرحملہ، اسرائیلی وزراء کو خاموش رہنے کا حکم

یروشلم (مانیٹرنگ ڈیسک)اسرائیلی وزیراعظم بنجمن نیتن یاھو نے وزراء کو ہدایت کی ہے کہ وہ شام پر امریکا اور اس کے اتحادیوں کے حملے پر کسی قسم کی بات چیت سے گریز کریں۔اسرائیل کے عبرانی ٹی وی 10 کی رپورٹ کے مطابق وزیراعظم نیتن یاھو کے دفتر سے جاری ہونے والے ایک بیان میں وزراء کو تاکید کی ہے کہ وہ سلامتی سے متعلق حساس امور بالخصوص شام میں ہفتے کے روز امریکا اور اس کے اتحادیوں کی طرف سے کی گئی کارروائی پر کسی قسم کی بیان بازی سے اجتناب کریں۔

وزیراعظم کی طرف سے یہ تاکید ایک ایسے وقت میں کی گئی ہے جب اسرائیلی وزیر برائے ہاؤسنگ یواف گالانٹ نے کہا تھا کہ شام پر امریکی حملہ ایران اور لبنانی حزب اللہ کے لیے اہم اشارہ ہے۔ ان کا کہنا تھا کہ کیمیائی ہھتیاروں کا استعمال سرخ لکیرعبور کرنے کے مترادف ہے اور اسے انسانیت کسی صورت میں گوارا نہیں کرے گی۔

عبرانی ٹی وی نے وزیراعظم یاھو کا ایک بیان نقل کیا ہے جس میں ان کا کہنا ہے کہ موجودہ حالات نازک ہیں اور میں کابینہ کے ارکان پر زور دیتا ہوں کہ وہ حساس نوعیت کےسیکیورٹی امور پر کسی قسم کی بیان بازی سے گریز کریں۔

خیال رہے کہ ہفتے کے روز امریکا، برطانیہ اور فرانس نے شام میں مختلف اہداف پر میزائل گرائے تھے۔ امریکا اور اس کے اتحادیوں نے شام پر حملے کو کامیاب قرار دیا ہے تاہم شام، روس اور ایران نے اس حملے کو مغرب کی کھلی جارحیت سے تعبیر کیا ہے۔

یہ بھی دیکھیں

امریکہ و اسرائیل سے وفا کی اُمید عرب آمروں کی حماقت ثابت ہوگی:تحریک مقاومت حماس کے رہنماء

مقبوضہ بیت المقدس (مانیٹرنگ ڈیسک)فلسطین کی اسلامی مقاومتی تحریک حماس کے رہنماء نے کہا ہے ...