جمعہ , 22 جون 2018

مہاتیر محمد نے وزراء کی تنخواہوں میں دس فیصد کمی کردی

کوالالمپور(مانیٹرنگ ڈیسک) ملائیشیا کے نو منتخب وزیراعظم ڈاکٹر مہاتیر محمد نے کابینہ میں شامل وزراء کی تنخواہوں میں دس فیصد تک کمی کا اعلان کردیا ہے۔بین الاقوامی نشریاتی ادارے کے مطابق ملائیشیا کے نومنتخب وزیراعظم مہاتیر محمد نے وزراء کی تنخواہوں میں دس فیصد کمی کرنے کا فیصلہ کرلیا ہے۔ نو منتخب کابینہ کے پہلے اجلاس کی سربراہی کرنے کے بعد مہاتیر محمد نے میڈیا سے بات چیت کرتے ہوئے کہا کہ ملک پر ڈھائی سو ارب ڈالر سے زائد کا قرضہ ہے جس میں کمی لانے کے لیے غیر ترقیاتی بجٹ کو کم کریں گے۔

نومنتخب وزیراعظم مہاتیر محمد کا کہنا تھا کہ سادگی کو اپناتے ہوئے غیر ضروری اخراجات میں کمی لائیں گے جس کے لیے پہلے مرحلے میں وزراء کی تنخواہوں میں دس فیصد کمی جائے گی جس کے بعد مہنگے منصوبوں میں کمی کے بارے میں بھی بہت جلد فیصلہ کرلیا جائے گا، جن میں سنگاپور اور کوالالمپور کے درمیان تیز رفتار ریل کے منصوبے کے علاوہ چار سال قبل ملائیشیا ایئر لائنز کے لاپتہ ہونے والے طیارے ایم ایچ 370 کی تلاش کا کام کرنے والی امریکی نجی کمپنی کے ساتھ معاہدہ بھی شامل ہے۔

واضح رہے کہ 92 سالہ ملائیشیا کے معمر ترین وزیراعظم مہاتیر محمد حال ہی میں ہونے والے انتخابات میں حکمراں جماعت کو شکست دے کر منتخب ہوئے ہیں اور کرپشن کے الزامات میں گھرے سابق وزیراعظم نجیب رزاق کو اہل خانہ سمیت بیرون ملک سفر کرنے پر پابندی عائد کردی ہے۔

یہ بھی دیکھیں

الیکشن میں جلسے جلوس کو نشانہ بنائے جانے کا خطرہ ہے: نگراں وزیرداخلہ

اسلام آباد (مانیٹرنگ ڈیسک) نگراں وزیرداخلہ اعظم خان نے کہا ہے کہ انتخابات میں ریلی ...