جمعہ , 23 اپریل 2021

عمران خان کی حکومت میں ملک کو ڈوبتے دیکھ رہا ہوں، وزیراعلیٰ سندھ

کراچی(مانیٹرنگ ڈیسک) وزیراعلیٰ سندھ مراد علی شاہ نے کہا ہے کہ وزیراعظم عمران خان کی حکومت میں ملک کو ڈوبتے دیکھ رہا ہوں۔سندھ اسمبلی میں وزیراعلیٰ سندھ مراد علی شاہ نے کراچی سرکلر ریلوے اور سی پیک سے متعلق منصوبوں پر بات کی۔ انہوں نے کہا کہ چینی کمپنیوں کو بنک گارنٹی دینے کے لیے وزیراعظم عمران خان اور وفاقی حکومت کو متعدد خطوط لکھے ہیں لیکن ان کے جواب نہیں دیے جارہے، اس سے اندازہ لگا لیں کہ ان کی کراچی میں کتنی دلچسپی ہے، ہفتہ بھر پہلے بھی وزیراعظم کو کے سی آر سے متعلق خط لکھا ہے، میں اس لیے خط لکھتا رہتا ہوں کہ شاید کبھی تو اثر ہوگا۔

مراد علی شاہ نے الزام لگایا کہ ان کا نام چین جانے کی وجہ سے ای سی ایل میں ڈالا گیا ہے اور وفاقی حکومت کو میرے دورہ چین پر اعتراض تھا۔ انہوں نے کہا کہ کراچی سرکلر ریلوے منصوبہ وفاق کے تعاون کے بغیر بننا ممکن نہیں ہے، ریلوے سے الگ ہماری لڑائی چل رہی ہے، ہمارے پاس پیسے نہیں ہیں لیکن ہم قرض لیکر اس منصوبے کے لئے 15 فیصد پیسے دینے کے لئے تیار ہیں۔

ایوان میں اظہار خیال کرتے کرتے وزیراعلیٰ جذباتی ہوگئے اور کہا کہ لوگوں کو سولی چڑھانا، مرنا مارنا بند کریں، اپنے ووٹروں کے لئے کام کریں جنہوں نے آپ کو ووٹ دیا، ملک کی معاشی حالت بہت خراب ہے، میں اس حکومت میں ملک کو ڈوبتے دیکھ رہا ہوں، اس حکومت کا اب صرف یہی کام رہ گیا کہ اس کو ماردو، اس کو پکڑ لو، وزیراعلی کی تقریر پر اپوزیشن ارکان نے احتجاج اور خوب شور شرابہ کیا۔

مراد علی شاہ نے مزید کہا کہ خدارا لوگوں کو جیلوں ڈالنا پھانسی لگانا بند کریں، سولی پر ایک کو تو چڑھا دیا مگر وہ آج تک زندہ ہے، ہمیں بھی سولی پر چڑھا دو، حساب لینے کی بات نہ کریں، ہم ہمیشہ حساب دیتے رہے ہیں وفاق سے اپنا حق زبردستی لیکر رہیں گے، اگر پکڑ دھکڑ کی تو وزارت عظمی بھی نہیں رہے گی۔

یہ بھی دیکھیں

پاکستان جنوبی ایشیا میں امن و استحکام کا خواہاں، عارف علوی

پاکستان کے صدر عارف علوی نے علاقائی تنازعات کے پرامن حل کی ضرورت پر زور …