ہفتہ , 17 اپریل 2021

یمن : سعودی جارحیت کے خلاف عوامی مظاہرے

صنعا (مانیٹرنگ ڈیسک)یمن کے مشرقی صوبے المہرہ کے شہریوں نے ایک بار پھر سعودی عرب کے جارحانہ اقدامات کے خلاف مظاہرہ کیا ہے۔یمن سے موصولہ خبروں کے مطابق یمن پر سعودی عرب کی جارحیت اور اسی طرح یمن کے راستے تیل پائپ لائن بچھانے کے آل سعود حکومت کے اقدامات کے خلاف یمن کے مختلف صوبوں میں عوام کے مظاہرے جاری ہیں اور مشرقی صوبےالمہرہ کے شہریوں نے بھی ایک بار پھر سعودی حکومت کے اس اقدام کے خلاف احتجاج کرتے ہوئے اسے ایک جارحانہ اقدام قرار دیا ہے-

سعودی عرب کی کوشش ہے کہ یمن کے راستے اپنے تیل کی پائپ لائن بچھا کر سعودی تیل آبنائے ہرمز کے بجائے اس راستے سے دیگر ملکوں کو برآمد کرے-یہ پائپ لائن پروجیکٹ یمن کے المہرہ صوبے سے گذر کر بحرالعرب میں جائے گی- صوبہ المہرہ میں سال دو ہزار اٹھارہ کے آغاز سے ہی سعودی عرب کے خلاف مظاہرے ہو رہے ہیں-

یمنی شہری اپنے ملک سے سعودی فوجیوں کے انخلا اور ملک کا محاصرہ ختم کئے جانے کا مطالبہ کر رہے ہیں،صوبہ المہرہ جسے یمن کا مشرقی دروازہ کہا جاتا ہے صوبہ حضرموت کے بعد یمن کا دوسرا سب سے بڑا صوبہ ہے-اس صوبے سے عمان کے لئے دو سرحدی گذر گاہیں ہیں جبکہ یمن کا سب سے طولانی ساحل اسی صوبے میں واقع ہے-

یہ بھی دیکھیں

میزائل تجربے پر تنقید : شمالی کوریا نے اقوام متحدہ پر چڑھائی کردی

شمالی کوریا نے میزائل ٹیسٹ کے بعد پابندیوں کی تجویز پر اقوام متحدہ پر چڑھائی …