اتوار , 19 مئی 2019

تبدیلی: فیس بک پر غلطی سے بھیجا گیا پیغام ‘ان سینڈ’ کرنا ممکن

واشنگٹن (مانیٹرنگ ڈیسک)کیا کبھی ایسا ہوا کہ آپ فیس بک پر کسی سے چیٹ کررہے ہوں اور غلطی سے کوئی ایسا پیغام دوست کے پاس چلا گیا جو آپ بھیجنا نہیں چاہتے تھے؟ اگر ہاں تو اب اس شرمندگی سے بچنا ممکن ہے۔جی ہاں منہ سے نکلے الفاظ واپس لینا تو ممکن نہیں مگر فیس بک پیغامات کو دوبارہ اپنے پاس کھینچ لینا اب ضرور ممکن ہے۔

فیس بک میسنجر میں آخرکار ایک سال بعد ان سینڈ بٹن کو متعارف کرا دیا گیا ہے۔فیس بک نے اعلان کیا ہے کہ یہ فیچر آئی او ایس اور اینڈرائیڈ فونز میں میسنجر ایپ کے نئے ورژن کا حصہ ہے۔

اپنے غلطی سے بھیجے گئے میسج کو ڈیلیٹ کرنے کے لیے آپ کو اپنے میسج کو دبا کر رکھنا ہوگا اور پھر ‘ remove ‘ پر کلک کرنا ہوگا۔اس کے بعد یہ ایپ پوچھے گی کہ کیا آپ یہ پیغام ہر ایک کے لیے ڈیلیٹ کرنا چاہتے ہیں یا اپنی حد تک، جیسا واٹس ایپ میں ہوتا ہے۔مگر ایک چیز کا خیال رکھنا ہوگا کہ آپ اپنا بھیجا ہوا پیغام 10 منٹ کے اندر ہی دوست کی نظروں سے غائب کرسکتے ہیں، اس کے بعد اسے ڈیلیٹ کرنا ممکن نہیں ہوگا۔

فیس بک کی جانب سے میسنجر میں اس فیچر کو متعارف کرانے کا اعلان گزشتہ سال اپریل میں اس وقت کیا گیا جب یہ انکشاف سامنے آیا کہ یہ کمپنی خاموشی سے اپنے سی ای او مارک زکربرگ کے میسنجر پر بھیجے جانے والے پرانے پیغامات کو ڈیلیٹ کررہی ہے۔اس انکشاف کے بعد کمپنی نے اعلان کیا ہے کہ بھیجے جانے والے پیغامات کو واپس بلانے کا فیچر بہت جلد تمام میسنجر صارفین کو دستیاب ہوگا۔

اب فیس بک نے اپنا وعدہ پورا کردیا ہے تاہم یہ ویسا نہیں جو کہ مارک زکربرگ کو دستیاب تھا یعنی 10 منٹ سے پرانے پیغام کو ڈیلیٹ کرنا ممکن نہیں، مگر یہ بھی کسی حد تک مستقبل میں شرمندگی سے بچانے میں مددگار ثابت ہوگا۔

یہ فیچر آج سے صارفین کے لیے متعارف کرانے کا سلسلہ شروع ہوا ہے تو ہوسکتا ہے کہ آپ کے فون میں اپ ڈیٹ نہ ہوا ہو تواسے استعمال کرنے کے لیے کچھ انتظار کرنا پڑسکتا ہے۔

ان سینڈ جیسا فیچر فیس بک کی زیرملکیت میسجنگ اپلیکشن واٹس ایپ میں 2017 میں متعارف کرایا گیا تھا جس کے ذریعے صارفین ایک خاص وقت کے دوران پیغام کو بھیجنے کے بعد ڈیلیٹ کرسکتے ہیں۔تاہم یہ میسج غائب نہیں ہوتا بلکہ دوسرے فرد کے پاس یہ نوٹ آجاتا ہے کہ میسج ڈیلیٹ کیا گیا ہے۔اسی طرح انسٹاگرام میں بھی اسی طرح کا ان سینڈ فیچر موجود ہے۔

یہ بھی دیکھیں

فیس بک کا لائیو اسٹریمنگ قوانین بدلنے کا اعلان

واشنگٹن (مانیٹرنگ ڈیسک)فیس بک نے نیوزی لینڈ کے شہر کرائسٹ چرچ میں مساجد پر حملے …