اتوار , 18 اگست 2019
تازہ ترین

ایوان صدر کے چڑیا گھر میں پنجروں کیلئےجاری ٹینڈر نوٹس واپس

اسلام آباد(مانیٹرنگ ڈیسک) صدر مملکت ڈاکٹر عارف علوی نے کیپیٹل ڈیولپمنٹ اتھارٹی (سی ڈی اے) کو ایوان صدر میں طوطوں کے لیے 20 لاکھ روپے مالیت کے نئے پنجرے بنانے کے لیے دیا گیا ٹینڈر نوٹس ختم کرنے کی ہدایت کردی۔ یہ ٹینڈر سوشل میڈیا پر خبروں کی زینت بنا تھا، جس نے صدر مملکت کی توجہ حاصل کی۔اس حوالے سے جاری بیان کے مطابق ایوان صدر کے ترجمان میڈیا کے ایک حصے میں آنے والی رپورٹس پر ردعمل دیتے ہوئے کہا کہ صدر مملکت ڈاکٹر عارف علوی نے ٹینڈر نوٹس کی اشاعت پر سنجیدگی سے نوٹس لیا۔ترجمان نے بتایا کہ ’صدر نے فوری طور پر مذکورہ ٹینڈر نوٹس کو واپس لینے اور انکوائری شروع کرنے کا حکم دیا، یہ ٹینڈر نوٹس متعلقہ اتھارٹی سے اجازت لیے بغیر جاری کیا گیا تھا‘۔

واضح رہے کہ سادگی پر مبنی بجٹ کے اعلان کے 2 روز بعد ہی وفاقی دارالحکومت کی شہری انتظامیہ نے ایوان صدر میں پرندوں کے پنجروں کے لیے 20 لاکھ روپے کا ٹینڈر جاری کیا تھا۔ایوان صدر میں سی ڈی اے کے ڈپٹی ڈائریکٹر (سول) محمد فاروق اعظم نے اخبارات، سی ڈی اے اور پاکستان پروکیورمنٹ ریگولیٹری اتھارٹی (پی پی آر اے) کی ویب سائٹس پر اشتہارات کے ذریعے ٹینڈر دیا تھا۔

پاکستان تحریک انصاف کے اقتدار میں آنے کے بعد وزیر اعظم ہاؤس سے تعلق رکھنے والی 8 بھینسوں کو 23 لاکھ روپے میں فروخت کردیا تھا، جو حکومتی اخراجات کم کرنے کے لیے وزیر اعظم عمران خان کی سادگی مہم کا حصہ تھا کیونکہ انہیں یقین تھا کہ قوم اس اقدام کی پیروی کرے گی۔ سی ڈی اے کے اشتہار میں ایوان صدر کے زو میں مکاؤ طوطوں کے لیے 19 لاکھ 50 ہزار مالیت کے نئے پنجرے بنانے کے لیے پاکستان انجینئرنگ کونسل اور انکم ٹیکس ڈپارٹمنٹ سے رجسٹرڈ قابل اعتماد کمپنیوں سے ٹینڈر طلب کیے گئے تھے۔ واضح رہے کہ مکاؤ سینٹرل اور جنوبی امریکا سے تعلق رکھنے والے پیلے، لال اور نیلے رنگ کے بڑے طوطے ہوتے ہیں۔

ایوان صدر میں یہ منی زو 2008 میں اس وقت کے صر آصف علی زرداری کے حکم پر قائم کیا گیا تھا کیونکہ کہا جاتا ہے کہ وہ جانوروں کا شوق رکھتے ہیں۔بعد ازاں اس زو کو صدر ممنون حسین کے دور میں بھی قائم رہنے دیا گیا تھا۔اس زو میں موجود جانوروں کے لیے خوراک کو مرغزار چڑیا گھر سے لایا جاتا ہے۔

اسی طرح مرغزار زو کے لیے مختص خوراک کا بڑا حصہ مبینہ طور پر ایوان صدر اور وزیر اعظم ہاؤس میں موجود چڑیا گھروں کے لیے لایا جاتا ہے، جہاں ان کے اپنے بجٹ سے چڑیا گھروں پر رقم خرچ نہیں کی جاتی بلکہ میٹروپولیٹن کارپوریشن اسلام آباد (ایم سی آئی) پر بوجھ ڈالا جاتا ہے۔

اس کے علاوہ مرکزی زو کے نگران اور ویٹرنیریئرز کو دیگر 2 چڑیا گھروں میں جانوروں کی دیکھ بھال کے لیے بھی رکھا جاتا ہے اور ان کی ادائیگی بھی ایم سی آئی کی جانب سے کی جاتی ہے۔ساتھ ہی یہ بات بھی سامنے آئی مرغزار زو سے نایاب اور مہنگے جانوروں کو ایوان صدر کے چھوٹے چڑیا گھر میں منتقل بھی کیا گیا تھا۔

دوسری جانب جب سی ڈی اے کے ڈپٹی ڈائریکٹر پبلک ریلیشن ملک سلیم سے رابطہ کیا تو انہوں نے اس بات کی تصدیق کی کہ اتھارٹی نے ایوان صدر کے چڑیا گھر میں طوطوں اور دیگر جانوروں کے پنجروں کے لیے ٹینڈر جاری کیا تھا۔

یہ بھی دیکھیں

حکومت کا ایک سال، معاون خصوصی اطلاعات فردوس عاشق آج کامیابیوں کی رپورٹ جاری کریں گی

اسلام آباد(مانیٹرنگ ڈیسک) حکومت کا ایک سال، معاون خصوصی اطلاعات فردوس عاشق آج کامیابیوں کی …