مودی حکومت کی زیر سرپرستی بھارت میں مذہبی دہشتگردی عروج پر ہے عالمی مذہبی آزادی رپورٹ

واشنگٹن(مانیٹرنگ ڈیسک)امریکہ نے عالمی مذہبی آزادی سے متعلق 2019 کی رپورٹ جاری کرتے ہوئے کہاہے کہ بھارت میں مودی حکومت کی سرپرستی میں مذہبی دہشتگردی عروج پر ہے ۔میڈیارپورٹس کے مطابق امریکی انتظامیہ نے عالمی مذہبی آزادی سے متعلق 2019 کی رپورٹ جاری کردی جس میں کہا گیا کہ مودی حکومت کی سرپرستی میں گزشتہ 2 سال سے مذہبی دہشتگردی عروج پر پہنچ چکی ہے ۔

سالانہ رپورٹ کے مطابق بھارت میں ہندو قوم پرست دھڑوں نے ہندوتوا کے تحت غیر ہندوؤں پر تشدد کیا اور انہیں دہشت اور خوف کا نشانہ بنایا گیا جبکہ مودی حکومت نے گزشتہ دور میں اس پر کوئی توجہ نہیں دی۔رپورٹ میں کہا گیا کہ حکمران جماعت بھارتیہ جنتا پارٹی سے وابستہ سیاسی لیڈر کھلے عام ہندوتوا کا پرچار کرتے ہیں اور مودی حکومت کا مستقبل میں بھی توجہ نہ دینے کا عندیہ نظر آرہا ہے ۔رپورٹ میں کہا گیا کہ ایک تہائی ریاستی حکومتوں نے گائے کے ذبح پر پابندی عائد کر رکھی ہے اور گائے ذبح کرنے کی جھوٹی اطلاع پر بھی مسلمانوں کو سرعام تشدد کر کے قتل کیا گیا۔

امریکی رپورٹ کے مطابق دودھ، دہی، چمڑے اور گوشت کے کاروبار سے وابستہ افراد پر تشدد ہوا اور ان کاروبار سے وابستہ 10 افراد کو گزشتہ سال قتل کیا گیا۔ رپورٹ میں کہا گیا کہ مسلمانوں سمیت اقلیتوں کی زبردستی مذہب تبدیلی کی تقاریب ہورہی ہیں، غیر ہندوؤں کو گھر واپسی نامی تقاریب منعقد کر کے زبردستی ہندو بنایا گیا۔رپورٹ کے مطابق بھارت کی 10 ریاستوں میں اقلیتوں کیلئے حالات بدتر ہوچکے ہیں، ان میں اتر پردیش، آندھرا پردیش، بہار، چھتیس گڑھ، گجرات، اڑیسہ، کرناٹک، مدھیہ پردیش، مہاراشٹر اور راجھستان شامل ہیں۔