ابتدائی مرحلے سے ہی باہر پاکستانی ٹیم کو 20 ملین روپے سے زائد ملنے کا امکان

کراچی(مانیٹرنگ ڈیسک) ورلڈ کپ کے ابتدائی مرحلے سے ہی باہر ہونے کے باوجود پاکستان ٹیم کو 20 ملین روپے سے زائد ملنے کا امکان ہے۔ایونٹ میں مایوس کن آغاز کے بعد گرین شرٹس نے شاندار کم بیک کرتے ہوئے آخری چاروں میچز لگاتار جیتے تھے، اگرچہ ان کی یہ محنت انھیں سیمی فائنل میں پہنچانے میں ناکافی رہی تاہم پانچویں نمبر پر رہنے کی وجہ سے وہ 20 ملین سے زائد حاصل کرنے کے حقدار بن گئے ہیں۔

ویب سائٹ ’’کرکٹ پاکستان‘‘ کے مطابق ایونٹ کی انعامی رقم کی تقسیم کے حساب سے پہلے راؤنڈ میں شرکٹ پر ہر ٹیم کو 7 ملین روپے جبکہ اس راؤنڈ میں ہر کامیابی پر 2.8 ملین روپے ملنے ہیں، مکمل نہ ہونے والے میچ کے لیے1.4 ملین روپے ملیں گے۔

اس طرح 5 کامیابیاں اور ایک واش آؤٹ میچ کی بنیاد پر گرین شرٹس کو 20 ملین سے زائد رقم ملے گی، ورلڈ کپ جیتنے والی ٹیم کو 280 ملین جبکہ رنر اپ کو 140 ملین روپے دیے جائیں گے، سیمی فائنلسٹ ٹیمیں 55 ملین روپے فی کس وصول کریں گی۔