اتوار , 17 نومبر 2019

پلک جھپکنے پر کسی بھی شے کو بڑا دکھانے والے ’اسمارٹ لینس‘

اسلام آباد(مانیٹرنگ ڈیسک)میڈیکل سائنس کی دنیا میں آئے روز نت نئی ایجادات عوام کی سہولیات کے لیے متعارف کرائی جا رہی ہیں اور ایسی ہی ایک زبردست ایجاد اسمارٹ لینس بھی ہے جس کی مدد سے پلک جھپکتے ہی کسی بھی شے کو بڑا کر کے دیکھا جا سکتا ہے۔یونیورسٹی آف کیلیفورنیا سین ڈیاگو کے ماہرین نے تحقیق کے بعد ایسے لینس تیار کیے ہیں جو کہ آنکھوں کی حرکات و سکنات سے کام کریں گے، یہ اسمارٹ لینس دو مرتبہ آنکھ جھپکنے پر کسی بھی چیز کو بڑا دکھا سکتے ہیں۔

سائنسدانوں کا کہنا ہے کہ یہ لینس بالکل انسانی آنکھوں کی طرح کام کریں گے اور انہیں آنکھوں کی حرکات (اوپر، نیچے، دائیں، بائیں، اور پلک جھپکنے) کی مدد سے کنٹرول کیا جا سکے گا۔ماہرین نے سب سے پہلے انسانی آنکھ کی پتلی کی حرکت سے پیدا ہونے والی برقی صلاحیت ’الیکٹرو آکیولیگراف سگنل‘ کو ناپا جس کے بعد انہوں نے ایسے لینس تیار کیے جو الیکٹرو آکیولیگراف سگنل کے ملتے ہی اِس پر ردعمل ظاہر کرے گا۔ان لینسس کو ’پولیمر کمپاؤنڈ‘ سے تیار کیا گیا ہے جو الیکٹرک سگنل ملتے ہی پھیل جاتا ہے۔

محققین کا کہنا ہے کہ اس لینس کو ایسے روبوٹس کے لیے استعمال کیا جا سکتا ہے جو کہ دور سے کنٹرول کیے جاتے ہیں جب کہ مستقبل میں اسے ’ایڈجسٹیبل گلاسس‘ (دور اور قریب کی چیزوں کو فوکس کر کے دکھانے والے عدسے) میں بھی استعمال کیا جا سکےگا۔

واضح رہے کہ ایسا پہلی بار نہیں ہوا کہ کسی نے اسمارٹ لینس متعارف کروائے ہوں بلکہ اس سے قبل بھی معروف سرچ انجن گوگل نے بھی 2014 میں ’گوگل کانٹیکٹ لینس‘ متعارف کروائے تھے جو لوگوں کے آنسو سے جسم میں گلوکوز کی سطح کی شناخت کر سکتے تھے۔بعد ازاں 2018 میں گوگل نے بغیر کوئی وجہ بتائے ہی اس پراجیکٹ کو ختم کرنے کا اعلان کر دیا تھا۔

یہ بھی دیکھیں

انسٹاگرام ویب ورژن میں اہم ترین فیچر متعارف کرائے جانے کا امکان

انسٹاگرام ایسی فوٹو شیئرنگ اپلیکشن ہے جس کے بیشتر اہم ترین فیچرز کا استعمال موبائل …