’ترکی اور کردوں کو ایک دوسرے کے ساتھ بچوں کی طرح لڑنا ہی تھا‘

ٹیکساس: امریکی صدر ڈونلڈ ٹرمپ کا کہنا ہے کہ انہوں نے ترک اور کرد افواج کو ہلاکت خیز مقابلے میں لڑائی کی اجازت دی کیوں کہ دونوں بچوں کی طرح ہیں جنہیں ایک دوسرے سے لڑنا تھا۔

فرانسیسی خبر رساں ادارے اے ایف پی کی رپورٹ کے مطابق ٹیکساس میں ایک ریلی سے خطاب کرتے ہوئے امریکی صدر کا کہنا تھا کہ ’میں نے جو کیا وہ غیر روایتی تھا، میں نے کہا تھا کہ وہ کچھ دیر بعد لڑ پڑیں گے‘۔

ان کا مزید کہنا تھا کہ یہ ایسا ہے ’جیسے کسی مجمعے میں 2 بچے ہوں، پہلے آپ انہیں لڑنے دیتے ہیں اور اس کے بعد آپ انہیں الگ کرتے ہیں‘۔

امریکی صدر نے کہا کہ ’وہ کچھ دن تک لڑے اور یہ بہت خطرناک تھا‘۔

ریلی میں خطاب کرتے ہوئے امریکی صدر نے اس بات پر زور دیا کہ ’امریکی خون کا ایک قطرہ تک نہیں بہایا گیا‘۔

امریکی صدر کا مزید کہنا تھا کہ ’ہم وہاں گئے اور ہم نے کہا کہ ہمیں تعطل چاہیے اور کرد بہت زبردست تھے وہ تھوڑا بہت پیچھے ہٹنے والے ہیں‘۔

انہوں نے کہا کہ ’ہم داعش کو اچھے طریقے سے پابند رکھنا چاہتے ہیں، ہم ان میں سے مزید کو تلاش کریں گے اور ترکی اس کے لیے تیار ہے‘۔

This is an obscene and ignorant statement. 200k innocent people displaced. Hundreds dead. Credible reports of war crimes. ISIS prisoners escaping. US evacuating and bombing its own positions or handing them to Russia. Two kids in a lot? https://t.co/rMJVcvOmFI

— Brett McGurk (@brett_mcgurk) October 18, 2019

امریکی صدر کے اس بیان پر داعش مخالف اتحاد کے سابق نمائندہ خصوصی بریٹ میک گرگ نے سخت تنقید کرتے ہوئے کہا کہ امریکی صدر کا ’2 بچوں‘ کی طرح لڑنے والا بیان ’بے ہودہ اور جاہلانہ‘ ہے۔

سماجی روابط کی ویب سائٹ ٹوئٹر پر ٹوئٹ کرتے ہوئے انہوں نے کہا کہ ’2 لاکھ بے گناہ افراد دربدر ہوئے، سیکڑوں ہلاک ہوئے، جنگ جرائم کی معتبر اطلاعات ہیں، داعش کے قیدی فرار ہوگئے، امریکا انخلا کررہا ہے اور اپنی ہی پوزیشنز پر بمباری کررہا یا انہیں روس کے حوالے کررہا ہے (اور آپ کہتے ہیں کہ) مجمعے میں 2 بچے لڑرہے ہیں’۔

یاد رہے کہ ڈونلڈ ٹرمپ نے شام کے شمال مشرقی علاقوں سے امریکی افواج کا انخلا کر کے کردوں کے خلاف ایک ہفتے پر محیط حملے کو ہوا دی تھی۔

شام میں جنگ سے ہونے والے جانی نقصانات پر نظر رکھنے والی سیریئن آبزرویٹری برائے انسانی حقوق کے مطابق ترکی کے حملوں کے نتیجے میں درجنوں شہریوں سمیت 5 سو سے زائد افراد ہلاک جبکہ 3 لاکھ شہری دربدر ہوئے۔

مذکورہ صورتحال امریکی صدر ڈونلڈ ٹرمپ کو ان کے وفادار ساتھیوں کی جانب سے بھی اس الزام کا سامنا کرنا پڑا تھا کہ ان کے ایک ہزار امریکی فوجیوں کو واپس بلانے کے فیصلہ کرد جنگجوؤں کو دھوکا دینا تھا جنہوں نے حالیہ سالوں میں داعش کے خلاف لڑائی میں گہرے زخم کھائے ہیں‘۔

بعدازاں 17 اکتوبر کو امریکی نائب صدر مائیک پینس کے ساتھ مذاکرات کے بعد ترکی نے سرحد کے ساتھ محفوظ علاقوں سے کردش اتحادی افواج کے انخلا کی صورت میں کارروائی معطل کرنے اور حملہ روکنے پر رضامندی کا اظہار کیا تھا۔