اسلام آباد : وزیر اعظم عمران خان سے کیوبا کے نائب صدر کی ملاقات

اسلام آباد : وزیر اعظم عمران خان سے کیوبا کے نائب صدر نے ملاقات کی، ملاقات میں دونوں ممالک کے درمیان تعلقات مزید مضبوط بنانے پراتفاق کیا گیا، وزیر اعظم نے کہا کہ عالمی برادری نہتے کشمیریوں کی تحریک کا ساتھ دے۔

تفصیلات کے مطابق اسلام آباد میں وزیراعظم عمران خان سے کیوبا کے نائب صدر نے وفد کے ساتھ ملاقات کی، ملاقات میں دونوں ممالک کے درمیان تعلقات مزید مضبوط بنانے پراتفاق کیا گیا۔

اس موقع پروزیر اعظم نے کہا کہ پاکستان اورکیوبا کے درمیان دوستانہ تعلقات ہیں۔ پاکستانی عوام میں کیوبا کے سابق صدر فیڈل کاسترو کا احترام پایا جاتا ہے، کیوبا میں انسانی ترقی متاثر کن ہے۔

انہوں نے کیوبن نائب صدر کو مقبوضہ کشمیر میں بھارتی افواج کے مظالم سے آگاہ کیا اور کہا کہ عالمی برادری نہتے کشمیریوں کی تحریک کا ساتھ دے۔

وزیر اعظم کا مزید کہنا تھا کہ ہم اقوام متحدہ کی قراردادوں کے مطابق مسئلہ کشمیر کا پرامن حل چاہتے ہیں، مقبوضہ کشمیر میں بھارت انسانی حقوق کی خلاف ورزیاں کررہا ہے۔

اس موقع پردونوں رہنماؤں نے سیاسی اورمعاشی تعلقات استوار کرنے پر اتفاق کیا۔ کیوبن وفد نے پاکستان میں صحت اور تجارت کے شعبوں میں دلچسپی کا اظہار بھی کیا۔