بدھ , 23 ستمبر 2020

بھارت میں زندہ جلائی گئی جنسی تشدد سے متاثرہ لڑکی دم توڑ گئی

اُتر پردیش: بھارت کی ریاست اُتر پردیش میں عدالت جاتے ہوئے جلائی گئی جنسی تشدد کا شکار 23 سالہ لڑکی زخموں کی تاب نہ لاتے ہوئے چل بسی۔

برطانوی خبررساں ادارے رائٹرز کے مطابق پولیس نے بتایا تھا کہ متاثرہ لڑکی ریپ کیس کی سماعت میں پیش ہونے کے لیے اناؤ جانے والی ٹرین میں سوار ہونے جارہی تھی کہ اس پر مٹی کا تیل چھڑک کر آگ لگادی گئی۔

متاثرہ لڑکی کے بیان کے مطابق اسے آگ لگانے میں 5 افراد ملوث تھے، جن میں اس کا ریپ کرنے والا ملزم بھی شامل تھا۔

مذکورہ واقعہ بھارت میں گزشتہ دو ہفتوں کے دوران منظر عام پر آنے والا خواتین کے خلاف دوسرا جرم ہے، جس نے عوام کی توجہ حاصل کرلی تھی۔

اس سے قبل حیدرآباد دکن میں ایک 23 سالہ ڈاکٹر کو ریپ کے بعد قتل کر کے لاش کو آگ لگادی گئی تھی، جس کے خلاف بڑے پیمانے پر احتجاج کا سلسلہ شروع ہوگیا تھا۔

تاہم گزشتہ روز پولیس نے چاروں ملزمان کو پولیس حراست سے فرار ہونے کی مبینہ کوشش پر گولی مار کر ہلاک کردیا تھا جس پر عوام کی اکثریت خوش دیکھی گئی۔

ادھر عدالت جاتے وقت جلائی گئی لڑکی کا دہلی کے صفدر جنگ ہسپتال میں علاج کرنے والی ڈاکٹر شلبھ کمار نے بتایا کہ وہ جمعے کے روز دل کا دورہ پڑنے سے انتقال کر گئیں۔

تفصیلات بتاتے ہوئے ان کا کہنا تھا کہ متاثرہ لڑکی 95 فیصد جھلس چکی تھی، اس کی سانس کی نالی بھی جل چکی تھی جس کے باعث پھیپھڑے گرم اور زہریلے بخارات سے بھر چکے تھے۔

پولیس دستاویز کے مطابق متاثرہ لڑکی نے مارچ میں اناؤ پولیس اسٹیشن میں شکایت درج کروائی تھی کہ اسے 12 دسمبر 2018 کو اسلحے کے زور پر ریپ کا نشانہ بنایا گیا۔

مقدمے کے اندراج کے بعد ملزم کو گرفتار کرلیا گیا تھا لیکن گزشتہ ہفتے ضمانت ملنے پر اسے جیل سے رہائی مل گئی تھی۔

خیال رہے کہ اتر پردیش بھارت کی سب سے زیادہ آبادی والی ریاست ہے اور خواتین کے خلاف جرائم کی تشویشناک صورتحال کے حوالے سے بدنام ہے، جہاں صرف 2017 میں ریپ کے 4 ہزار 2 سو سے زائد کیسز رپورٹ ہوئے جو پورے بھارت میں سب بڑی تعداد ہے۔

اتر پردیش حکومت بھارتی وزیراعظم نریندر مودی کی بھارتیہ جنتا پارٹی (پی جے پی) کے پاس ہے، جس پر جولائی میں اپوزیشن کی جانب سے ریپ کے ملزمان کو تحفظ دینے کا الزام لگاتے ہوئے سخت تنقید کا نشانہ بنایا گیا تھا۔

یہ بھی دیکھیں

عبدالمجید اچکزئی کی بریت کا فیصلہ بلوچستان ہائی کورٹ میں چیلنج

کوئٹہ: محکمہ پولیس بلوچستان نے عبدالمجید اچکزئی کی بریت کے فیصلہ کو بلوچستان ہائی کورٹ …