Iblagh News | حقائق تک رسائی اور ان کا ابلاغ
ریاض : سعودی عرب کا سال2020 کے لیے ایک ٹریلن 20 ارب ریال کا بجٹ منظور کرلیا گیا، سرکاری ملازمین کیلئے مہنگائی الاؤنس میں مزید ایک سال کی توسیع کردی گئی۔
تفصیلات کے مطابق سعودی عرب کے فرمانروا شاہ سلمان بن عبدالعزیز کی زیرصدارت کابینہ کا ہنگامی اجلاس ریاض میں ہوا، اجلاس میں نئے مالی سال کے قومی بجٹ کی منظوری دی گئی۔
غیر ملکی خبر رساں ایجنسی کے مطابق سعودی عرب نے 2020 کے لیے ایک ٹریلن20 ارب ریال کے قومی بجٹ کا اعلان کردیا ہے۔ بجٹ میں آمدنی کا تخمینہ 833 ارب ریال لگایا گیا ہے۔
یہ187 ارب ریال خسارے کا بجٹ ہے۔ بجٹ میں سرکاری ملازمین کیلئے مہنگائی الاؤنس میں مزید ایک سال کی توسیع کی بھی منظوری دی گئی ہے۔
اجلاس سے خطاب کرتے ہوئے شاہ سلمان بن عبدالعزیز نے کہا کہ حکومت اصلاحات اور آمدنی کے ذرائع بڑھانے کیلئے پُرعزم ہے، پبلک انویسٹمنٹ فنڈ آرامکو حصص سے ملنے والی رقم منافع بخش اسکیموں میں لگائی جائے گی۔
انہوں نے کہا کہ نئے بجٹ سے سعودی عرب میں ترقی کا عمل مضبوط ہوگا۔ اقتصادی و مالی استحکام کا قیام اور شرح نمو کو مزید پائیداری ملے گی۔ عوام کی زندگی کا معیار بلند کیا جائے گا اور مکانات کی اسکیمیں مستقل بنیادوں پر نافذ کی جائیں گی۔
انہوں نے مزید کہا کہ موجودہ سعودی بجٹ عوام کے لیے خدمات کا معیار بلند کرنے اور بنیادی سہولتیں بہتر انداز میں مہیا کرنے کی پالیسی کا ضامن ہے۔
