مشرقی افریقہ: ٹڈی دل کا شدید حملہ، اقوامِ متحدہ کی اقوام عالم سے مدد کی اپیل

اقوامِ متحدہ نے مشرقی افریقہ میں ٹڈی دل کے شدید حملے سے نمٹنے کے لیے اقوام عالم سے مدد کی اپیل کر دی ہے۔

اقوامِ متحدہ کے خوراک اور کاشتکاری کے ادارے (ایف اے او) کے ترجمان کے مطابق یہ مدد خوراک اور ذریعہ معاش کی حفاظت اور غذائی قلت کے خطرے سے نمٹنے کے لیے مانگی گئی ہے۔

مشرقی افریقہ کے ممالک ایتھوپیا، کینیا اور صومالیہ میں بڑے پیمانے پر خوراک کھانے والے حشرات نے حملہ کر دیا تھا۔ایف اے او کو ڈر ہے کہ ٹڈی دل کی تعداد میں جون تک 500 فیصد تک اضافہ ہو سکتا ہے۔

ادارے کے مطابق ایتھوپیا اور صومالیہ نے اس پیمانے پر ان حشرات الارض کے حملے گذشتہ 25 سال میں نہیں دیکھے جبکہ کینیا میں ایسا گذشتہ 70 برس میں نہیں ہوا۔اگر ٹڈی دل کے جھنڈ اسی رفتار سے پھیلتے اور بڑھتے رہے تو ان سے جنوبی سوڈان اور یوگینڈا بھی متاثر ہو سکتے ہیں۔

مشرقی افریقہ میں ان کی تعداد میں اضافے کے علاوہ ان کی افزائش انڈیا، ایران اور پاکستان میں بھی ہو رہی ہے جہاں یہ موسم بہار کے دوران جھنڈ کی شکل اختیار کر سکتے ہیں۔ٹڈی دل عام طور پر ایک دن میں 150 کلو میٹر تک سفر کر سکتے ہیں۔ ایک خاص عمر میں پہنچنے کے بعد کیڑا اپنے وزن کے برابر کھانا کھا سکتا ہے۔

پاکستان کے شہر سیالکوٹ میں موسم بہار میں ٹڈی دل کے ممکنہ حملے سے بچنے کے لیے کسانوں کو آگاہی فراہم کی جا رہی ہے۔

یاد رہے کہ گذشتہ برس نومبر کے مہینے میں پاکستان کے صوبہ سندھ میں ٹڈی دل کا حملہ ہوا تھا جس سے فصلوں کو شدید نقصان پہنچا تھا۔