شام میں روس کی فضائی کارروائی کے دوران داعش کے دو ہزار آئل ٹینکرز تباہ

روس نے شام میں فضائی کارروائیوں کے دوران داعش کے دو ہزار آئل ٹینکرز تباہ کر دیئے ہیں۔ روسی وزارت دفاع نے ویڈیو جاری کر دی۔ ماسکو میں پریس بریفنگ کے دوران وزارت دفاع کے ترجمان نے بتایا کہ روسی طیاروں نے گذشتہ روز دمشق، حلب اور لطاکیہ میں ایک سو پینتالیس فضائی کارروائیوں کے دوران کئی اہداف کو نشانہ بنایا۔ ترجمان کے مطابق روسی فوج نے تیس ستمبر سے اب تک شام میں پانچ ہزار دو سو چالیس فضائی کارروائیاں کی ہیں، جن میں داعش کے تقریبا دو ہزار آئل ٹینکرز کو تباہ کیا گیا۔ ادھر غیر ملکی خبر رساں ایجنسی کے مطابق دمشق میں باغیوں کے ہیڈ کواٹرز پر فضائی حملے کے دوران اہم باغی رہنما زھران علوش ہلاک ہوگئے ہیں۔ وہ شام میں باغیوں کے سب سے بڑے گروپ کے سربراہ تھے۔ شامی فوج اور باغیوں نے زھران علوش کی ہلاکت کی تصدیق کر دی ہے