پاکستان میں کورونا پھیلانے والی جماعت

جہاں دنیا بھر میں کورونا کے متاثرین کی تعداد بڑھ رہی ہے وہیں پاکستان میں بھی کورونا وائرس میں مبتلا افراد کی تعداد اوراسی طرح اموات میں مسلسل اضافہ ہو رہا ہے۔پاکستان کے صوبہ سندھ کی وزیر صحت اور بہبود آبادی کی میڈیا کوآرڈینیٹر میران یوسف کے مطابق حیدر آباد میں اس وقت کورونا کے کیسز کی تعداد تینتالیس ہوگئی ہے جن میں سے چھتیس کیسز تبلیغی جماعت کے ارکان سے متعلق ہیں۔ان کا کہنا تھا کہ نئے کیسز نور مسجد سے رپورٹ ہوئے ہیں جہاں پہلے ہی تبلیغی جماعت کے دوسو ارکان کو قرنطینہ میں رکھا گیا ہے۔خیال رہے کہ حیدر آباد کی نور مسجد، سندھ میں تبلیغی جماعت کا دوسرا بڑا مرکز ہے جس کو گزشتہ ہفتے انیس سالہ چینی نژاد تبلیغی رکن میں وائرس مثبت آنے کے بعد سیل کردیا گیا تھا۔ تبلیغی جماعت سے منسلک افراد میں کورونا وائرس کی تصدیق کے بعد سندھ کے شہریوں میں خوف و ہراس پیدا ہوا جبکہ گیارہ مارچ سے پندرہ مارچ کے دوران لاہور کے علاقے رائیونڈ میں تبلیغی جماعت کا اجتماع ہوا تھا جس کے بعد جماعت کے اراکین میں وائرس مثبت آنے کی رپورٹس سامنے آئیں۔

سندھ میں اس وقت کورونا وائرس کے کیسز کی تعداد پانچ سو چھیاسٹھ ہے جبکہ پنجاب میں چھے سو اکیاون، بلوچستان میں ایک سو باون، خیبرپختونخوا میں دوسو اکیس، گلگت بلتستان میں ایک سو اٹھائیس، اسلام آباد میں اکیاون اور پاکستان کے زیر انتظام کشمیر میں ایک سو باون کیسز رپورٹ ہوئے ہیں۔ ملک میں متاثرین کی مجموعی تعداد ایک ہزار سات سو پچھتر ہوگئی ہے اور چوبیس افراد جان کی بازی ہار گئے جبکہ اب تک ستاون افراد صحت یاب ہوچکے ہیں۔قابل ذکر ہے کہ دنیا کے تقریبا دوسو ممالک میں کورونا وائرس سرایت کر چکا ہے ۔