فلسطین میں صیہونی قبضے کے ہوتے ہوئے امن و آشتی ناممکن: ایران

ایران کی وزارت خارجہ نے اپنے بیان میں کہا کہ ’’یوم الارضِ فلسطین‘‘ مظلوم فلسطینی عوام کی سیاسی اور مجاہدتی زندگی کا جزء لا ینفک ہے جو سرزمین فلسطین پر ناجائز قبضے، نسلی امتیاز، وحشیانہ تشدد، فلسطینی بستیوں کی تباہی اور فلسطینیوں کو ان کے وطن سے محروم اور بے گھر کئے جانے کے خلاف منایا جاتا ہے۔ ایرانی وزارت خارجہ نے مطالبہ کیا ہے کہ کورونا وائرس کے پھیلاؤ کے پیش نظر عالمی برادری سبھی فلسطینی قیدیوں کو اسرائیلی جیلوں سے آزاد اور غزہ کا محاصرہ فوری طور پر ختم کرائے اور مظلوم فلسطینی عوام تک انسانی امداد اور حفظان صحت سے متعلق ضروری اشیاء پہنچائے جانے کو یقینی بنائے ۔حزب اللہ لبنان نے بھی پیر کی رات ایک بیان جاری کر کے مظلوم فلسطینی عوام کی حمایت جاری رکھنے کا اعلان کیا ہے ۔ حزب اللہ نے اعلان کیا ہے کہ سبھی مقبوضہ فلسطینی علاقے آزاد ہونے تک غاصب صیہونیوں کے خلاف جد و جہد جاری رہے گی۔

یاد رہے کہ غاصب صیہونی حکومت نے انتس مارچ انیس سو سڑسٹھ کو فلسطینیوں کی ہزاروں ہیکٹر زمینوں پر قبضہ کرلیا تھا اور اس کے ایک دن بعد تیس مارچ کو اس ناجائز قبضے کے خلاف فلسطینیوں نے یوم الارض کے عنوان سے مظاہرے کئے تھے۔ مظایرن پر صیہونی فوجیوں کے حملے میں متعدد فلسطینی شہید اور سیکڑوں زخمی ہوگئے تھے جبکہ سیکڑوں فلسطینیوں کو صیہونیوں فوجیوں نے گرفتار کرلیا تھا۔ اسی طرح تیس مارچ دو ہزار اٹھارہ کو امریکی سفارت خانہ تل ابیب سے بیت المقدس منتقل کئے جانے کے خلاف فلسطینی عوام نے اپنے عظیم واپسی مارچ کا آغاز کیا تھا جو ہر جمعے کی شام کو غزہ میں انجام پاتا رہا ہے۔ اس مارچ پر صیہونی فوجیوں کی فائرنگ میں کم از کم تین سو سینتیس فلسطینی شہید اور تیس ہزار سے زائد زخمی ہو چکے ہیں۔