Iblagh News | حقائق تک رسائی اور ان کا ابلاغ
خلیجی ریاست عُمان نے کرونا وائرس کو پھیلنے سے روکنے کے لیے مسقط گورنری میں 10سے 22 اپریل تک لاک ڈاؤن کا اعلان کیا ہے۔عُمان کی اعلیٰ کمیٹی برائے انسداد کرونا وائرس نے بدھ کو ایک ٹویٹ میں کہا ہے کہ اس عرصے کے دوران میں مسقط کی گورنری میں داخلے یا وہاں سے خروج پر پابندی عاید ہوگی۔عُمان میں اب تک کرونا وائرس کے 419 کیسوں کی تصدیق کی گئی ہے۔ان میں 48 کیس گذشتہ 24 گھنٹے میں ریکارڈ کیے گئے ہیں۔
دریں اثناء عُمان کے سلطان ہیثم بن طارق السعید نے مختلف جرائم میں جیلوں میں بند 599 قیدیوں کی سزائیں معاف کردی ہیں۔ ان میں 336 غیرملکی بھی شامل ہیں۔عُمان نیوز ایجنسی نے سلطان کے اس فیصلے کی ایک ٹویٹ میں اطلاع دی ہے لیکن یہ نہیں بتایا ہے کہ آیا انھیں اس ننھی خلیجی ریاست میں کرونا وائرس پھیلنے کے پیش نظر رہا کیا گیا ہے یا ان قیدیوں کو رمضان المبارک کے آغاز سے قبل معافی دی گئی ہے۔ ماہِ صیّام کا دو ہفتے کے بعد آغاز ہورہا ہے۔
