پاکستان نے سابق طالبان سرغنہ کی جائیدادیں ضبط کرنے کا حکم دیا

کراچی کی انسداد دہشت گردی کی عدالت نے طالبان کے سابق سرغنہ ملا اختر منصور کی جائیدادیں نیلامی کے لئے ضبط کر لی ہیں۔پاکستانی ذرائع کے مطابق انسداد دہشت گردی کی عدالت نے افغان طالبان کے سابق سرغنہ ملا اختر منصور کی لگ بھگ تین کروڑ بیس لاکھ روپئے مالیت کی جائیدادیں ضبط اور ان کی نیلامی کا حکم دیا ہے۔

دہشت گردوں کی مالی معاونت اور منی لانڈرنگ کی تحقیقات کے دوران یہ بات سامنے آئی تھی کہ ملا اختر منصور نے اپنی جعلی شناخت استعمال کر کے پاکستان کے صوبہ سندھ میں یہ جائیدادیں خریدی تھیں۔ رپورٹ کے مطابق ملا اختر منصور نے کراچی میں پلاٹس اور گھروں سمیت پانچ جائیدادیں بنائیں تھیں۔ملا اختر منصور تقریبا چار سال قبل پاکستان کے صوبہ بلوچستان میں  امریکہ کے ڈرون حملے میں ہلاک ہوگیا تھا۔