پیر , 12 اپریل 2021

صدر ٹرمپ کے فیس بک اور انسٹا گرام اکاؤنٹس پر بھی پابندی

واشنگٹن: فیس بک اور انسٹاگرام نے صدر ٹرمپ کے اکاؤنٹس غیر معینہ طور پر بند کردیے ہیں۔

جمعرات کو فیس بک کے چیف ایگزیکٹیو مارک زکر برگ نے کہا ہے کہ امریکی دارالحکومت میں تشدد پر اکسانے اور اشتعال انگیزی کے باعث صدر ٹرمپ کے فیس بک اور انسٹا گرام کے اکاؤنٹس معطل کردیے گئے ہیں۔

اپنے فیس بک پیج پر مارک زکر برگ نے کہا کہ ایک منتخب جمہوری حکومت کے خلاف بغاوت اور تشدد پر اکسانے کی بنا پر پہلے یہ اکاؤنٹ صرف 24 گھنٹے کے لیے بند کیے گئے تھے۔ تاہم اگر صدر کو ہماری خدمات استعمال کرنے کی اجازت دی گئی تو یہ بہت بڑا خطرہ ہوگا۔
یہ خبر بھی پڑھیے:ٹرمپ کے حامیوں کا کانگریس کی عمارت پر دھاوا، 4 افراد ہلاک

انہوں نے کہا کہ اس خطرے کے پیش نظر صدر ٹرمپ کے فیس بک اور انسٹا گرام اکاؤنٹس پر غیر معینہ مدت تک پابندی عائد کی جارہی ہے اور کم از کم یہ پابندی اقتدار کی منتقلی مکمل ہونے کے آئندہ دو ہفتوں تک برقرار رہے گی۔

اس سے قبل مائیکرو بلاگنگ کی ویب سائٹ ٹوئٹر نے بھی صدر ٹرمپ کا اکاؤنٹ لاک کردیا ہے جب کہ گذشتہ شب مظاہرین سے متعلق ان کا ویڈیو بیان اور ٹوئٹ بھی حذف کردیا تھا۔

 

یہ بھی دیکھیں

ایران و چین معاہدے پر امریکہ چراغ پا

امریکی صدر نے ایران اور چین کے 25 سالہ معاہدے پر سخت تشویش کا اظہار …