بدھ , 23 جون 2021

فیس بک انتظامیہ نے وینزویلا کے صدر کا پیج بھی معطل کردیا

کراکس : فیس بک انتظامیہ نے کورونا وائرس سے متعلق غلط معلومات پوسٹ کرنے پر وینزویلا کے صدر کا پیج معطل کردیا۔

غیر ملکی خبر رساں ادارے کے مطابق فیس بک انتظامیہ کا کہنا ہے کہ وینزویلا کے صدر نیکولس ماڈیورو نےکورونا کے علاج کی غلط معلومات شیئر کی تھیں۔

فیس بک انتظامیہ کے مطابق وینزویلا کے صدر نیکولس ماڈیورو نے ایک قدیم دوا کو کورونا وائرس کا علاج بتایا تھا جس پر ڈاکٹروں کا دعویٰ ہے کہ یہ کورونا وائرس کا علاج نہیں ہے۔

فیس بک نے وینزویلا کے صدر کی اس حوالے سے شیئر کی گئی ویڈیو کو فیس بک کی کورونا کے حوالے سے نافذ پالیسی کی خلاف ورزی قرار دیتے ہوئے ڈیلیٹ کردیا۔

فیس بک کا کہنا ہے کہ پالیسی کی خلاف ورزی پر وینزویلا کے صدر کا اکاؤنٹ کو معطل کیا گیا ہے کیونکہ صدر نکولس نے کورونا سے محفوظ رہنے یا صحتیاب ہونے سے متعلق گارنٹی دی تھی۔

اس حوالے سے فیس بک ترجمان نے رائٹرز کو بتایا کہ ہم ورلڈ ہیلتھ آرگنائزیشن (ڈبلو ایچ او) کی ہدایت پر عمل کرتے ہیں کہ فی الحال اس وائرس کے علاج کیلئے کوئی دوا نہیں ہے اور ہمارے قوانین کی بار بار خلاف ورزیوں کی وجہ سے ہم 30 دن کیلئے صفحہ بھی معطل کر رہے ہیں۔

واضح رہے کہ وینزویلا کے سرکاری اعداد و شمار کے مطابق ملک میں کورونا وائرس کے ایک لاکھ 54 ہزار905مریض اور ایک ہزار 543 اموات سامنے آئی ہیں۔

یہ بھی دیکھیں

گورنر سندھ کا وزیراعظم سے آئی جی سندھ کو عہدے سے ہٹانے کا مطالبہ

کراچی: سندھ کے گورنر عمران اسمٰعیل نے وزیراعظم عمران خان سے ملاقات کرکے سندھ پولیس …