پیر , 8 مارچ 2021

’پاکستان تیزی سے اقتصادی ترقی کی راہ پر گامزن‘

jimyonkim

ورلڈ بینک کے صدر جِم یونگ کِم کا کہنا ہے کہ پاکستان اقتصادی ترقی و خوشحالی کی راہ پر گامزن ہوگیا ہے۔

یہ بات انہوں نے وزیراعظم نواز شریف اور وفاقی وزیر خزانہ اسحاق ڈار سے الگ الگ ملاقاتوں میں کہی۔

پہلی بار پاکستان کے دورے پر آنے والے جِم یونگ کِم نے حکومت کی اقتصادی پالیسیوں کو سراہتے ہوئے کہا کہ موجودہ معاشی ٹیم کی کوششوں سے پاکستان کے معاشی اشاریے مستحکم ہوئے ہیں اور حکومت کے پاس معیشت میں اصلاحات کرکے ملک میں غربت کم کرنے کا اچھا موقع ہے۔

وزیراعظم سے ملاقات میں ورلڈ بینک کے صدر نے اقتصادی اصلاحات کی اہمیت کو اجاگر کیا اور نواز شریف سے دو سال قبل واشنگٹن میں ہونے والی ملاقات کو تذکرہ کرتے ہوئے کہا کہ حکومت پاکستان نے گزشتہ تین سالوں میں ملکی معیشت کو مستحکم کیا ہے۔

ملاقات کے دوران ملک میں روزگار کے مواقعوں کے لیے نجی شعبے کے کردار کے فروغ، توانائی کے شعبے میں اصلاحات تیز کرنے، کمیونٹی کی سطح پر تعلیم اور صحت کے شعبوں میں بہتری لانے اور انسداد غربت جیسے معاملات پر تبادلہ خیال کیا گیا۔

اس موقع پر وزیراعظم کا کہنا تھا کہ حکومت معیشت میں نجی شعبے کے کردار کی حوصلہ افزائی کرتی ہے اور تاجروں کو سرمایہ کاری کے لیے سازگار ماحول فراہم کررہی ہے، کیونکہ نجی شعبے کو مراعات دینے کا فائدہ پورے ملک کو پہنچتا ہے۔

انہوں نے کہا کہ جب بھی حکومتیں کاروبار کرنا شروع کردیں تو انھیں سبسڈی کی مد میں بڑا نقصان اٹھانا پڑتا ہے، حکومت معیشت میں بہتری کے لیے کوشاں ہے اور توانائی، ریل، روڈ انفراسٹرکچر، تعلیم و صحت کے بڑے منصوبوں پر کام کر رہی ہے۔

ان کا مزید کہنا تھا کہ داسو ہائیڈرو پاور اور تربیلا توسیعی منصوبے میں عالمی بینک کا تعاون بہت مفید ہے اور ان منصوبوں سے ملک میں سستی بجلی دستیاب ہوگی۔

عالمی بینک کے صدر نے وزیراعظم کو مختلف شعبوں میں تعاون جاری رکھنے کی بھی یقین دہانی کرائی۔

یہ بھی دیکھیں

فلسطین کی آزادی اور اسرائیل کا خاتمہ، پاکستانی قوم کی خواہش

حماس کے رہنما اسمٰعیل ہنیہ نے کہا ہے کہ پاکستان نے ہمیشہ فلسطین کی حمایت …