بدھ , 3 مارچ 2021

لاہور میں انسداد پولیو مہم کا کارکن فائرنگ سے زخمی

160113055541_polio_police_pakistan_640x360_afp_nocredit

لاہور پولیس کے کنٹرول روم میں موجود اہلکار نے بتایا کہ فائرنگ کا واقعہ بدھ کی صبح لاہور میں چوبرجی کے قریب راج گڑھ کے علاقے میں پیش آیا۔
لاہور سمیت پاکستان بھر کے 83 ’خطرناک قرار دیے گئے‘ اضلاع میں پیر سے انسدادِ پولیو مہم شروع ہوئی تھی۔
پولیس کے مطابق عمر خان نامی کارکن اپنے ایک ساتھی کے ہمراہ قطرے پلانے کے لیے پیدل جا رہے تھے جب موٹرسائیکل پر دو سوار نامعلوم حملہ آوروں نے ان پر فائرنگ کی۔
پولیس اہلکار کا کہنا ہے کہ عمر خان کی ٹانگ پر گولی لگی اور انھیں میو ہسپتال منتقل کر دیا گیا ہے جہاں ان کی حالت خطرے سے باہر ہے۔
پولیس کے مطابق حملے کا نشانہ بننے والی اس ٹیم نے مہم کے ضابطۂ کار کے تحت کام شروع کرنے سے قبل مقامی تھانے میں اطلاع نہیں دی تھی اس لیے ان کے ساتھ سکیورٹی اہلکار نہیں تھے۔
حملے کے بعد پولیس نے علاقے کی ناکہ بندی کر کے حملہ آوروں کی تلاش شروع کر دی ہے۔
خیال رہے کہ ماضی میں کراچی، خیبرپختونخوا اور بلوچستان سمیت ملک کے دیگر علاقوں میں انسداد پولیو ورکرز پر حملوں کے واقعات سامنے آتے رہے ہیں جبکہ لاہور میں یہ اس نوعیت کا پہلا واقعہ ہے۔
رواں سال کے آغاز میں کوئٹہ میں انسداد پولیو مرکز کے باہر ایک خود کش بم حملے میں کم از کم 14 افراد ہلاک اور 25 زخمی ہوئے تھے۔
گذشتہ سال 2015 میں سنہ 2014 کے مقابلے میں انسداد پولیو ٹیموں اور ان کی سکیورٹی پر تعینات پولیس اہلکاروں پر حملوں میں کمی دیکھی گئی تھی۔

یہ بھی دیکھیں

فلسطین کی آزادی اور اسرائیل کا خاتمہ، پاکستانی قوم کی خواہش

حماس کے رہنما اسمٰعیل ہنیہ نے کہا ہے کہ پاکستان نے ہمیشہ فلسطین کی حمایت …