Iblagh News | حقائق تک رسائی اور ان کا ابلاغ
کیپ ٹاؤن(مانیٹرنگ ڈیسک) کیپ ٹاؤن کے تیسرے روز جنوبی افریقہ کی ٹیم 431 رنز بنا کر آؤٹ ہو گئی، پروٹیز نے 254 رنز کی برتری حاصل کر لی۔ کپتان ڈوپلیسی نے سنچری سکور کی۔ پاکستان کی دوسری اننگز میں بیٹنگ جاری ہے۔
جنوبی افریقہ نے کیپ ٹاؤن ٹیسٹ کے تیسرے روز 6 وکٹوں کے نقصان پر 382 رنز سے اننگز کا آغاز کیا۔ پروٹینز کے بلے باز زیادہ دیر ٹک وکٹ پر ٹھہر نہ سکے اور ٹیم کے مجموعی سکور میں صرف 45 رنز کا ہی اضافہ کرسکے۔ قومی فاسٹ باؤلر محمد عامر اور شاہین شاہ آفری نے 4، 4 کھلاڑیوں کو آؤٹ کیا۔
یاد رہے جنوبی افریقی بلے باز ہاشم آملہ اور تھیونس ڈی بریون نے 123 رنز سے دوسرے روز کھیل کا آغاز کیا تو آملہ اپنے انفرادی اسکور میں کوئی اضافہ کیے بغیر 24 رنز پر محمد عباس کی گیند پر کلین بولڈ ہوگئے۔
جس کے بعد ڈی بریون اور کپتان فاف ڈپلوسی نے چوتھی وکٹ پر اسکور کو آگے بڑھایا اور ٹیم کا مجموعہ 149 تک پہنچا تو ڈی بریون کی اننگز بھی اختتام پذیر ہوئی، انہیں شاہین شاہ نے آؤٹ کیا۔ کپتان فاف ڈوپلیسی اور ٹیمبا باووما نے پانچویں وکٹ کے لیے 156 رنز کی شراکت قائم کر کے پاکستانی ٹیم کے لیے مشکلات بڑھا دیں۔
باووما 75 رنز بنا کر شاہین آفریدی کی گیند پر سرفراز احمد کے ہاتھوں کیچ آؤٹ ہوئے جب کہ ڈوپلیسی بھی 103 رنز کی شاندار اننگز کھیل کر شاہین آفریدی کا شکار بنے، ان کا کیچ بھی سرفراز احمد نے ہی تھاما۔ دوسرے روز کا کھیل ختم ہوا تو کوئنٹن ڈی کوک 55 اور فلینڈر 6 رنز کے ساتھ وکٹ پر موجود تھے۔
کیپ ٹاؤن ٹیسٹ میں جنوبی افریقی کپتان فاف ڈپلوسی نے ٹاس جیت کر پہلے بیٹنگ کی دعوت دی تو پاکستان کی پوری ٹیم 177 رنز پر ڈھیر ہوگئی تھی۔ پروٹیز اوپننگ بلے باز ایڈن مرکرم 78 اور ڈین ایلگر 20 رنز بنا کر آؤٹ ہوئے۔
واضح رہے کہ جنوبی افریقا نے پاکستان کو پہلے ٹیسٹ میں شکست دی تھی جس کے بعد میزبان ٹیم کو تین میچز پر مشتمل سیریز میں 0-1 کی برتری حاصل ہے۔پاکستان نے آج تک جنوبی افریقا کی سرزمین پر کوئی سیریز نہیں جیتی اور کیپ ٹاؤن میں پاکستان کا ریکارڈ بھی کچھ اچھا نہیں، اس گراؤنڈ پر دونوں ٹیموں کے درمیان تین ٹیسٹ سیریز ہوئیں اور تینوں میں جنوبی افریقا نے پاکستان کو شکست دی۔
