بچوں کو دودھ پلانے کے قابل بنانے کے لیے مزدور خواتین کو وظائف دینے کا اعلان

لاہور(مانیٹرنگ ڈیسک) وزیر بہبود آبادی پنجاب کرنل (ر) ہاشم ڈوگر نے کہا ہے کہ پنجاب حکومت بینظیر انکم سپورٹ پروگرام کی طرز پر ایسا پروگرام مرتب کررہی ہے جس کے تحت مزدور خواتین کو وظائف دیے جائیں گے تاکہ وہ گھر رہ کر اپنے بچے کو دو سال تک دودھ پلا سکیں۔ان کا کہنا تھا کہ اس عمل سے نہ صرف بچوں کی پیدائش میں قدرتی وقفہ آئے گا بلکہ مائیں بھی اپنی ساری توجہ بچے کی تربیت پر مرکوز کریں گی۔

ان خیالات کا اظہار انہوں نے لاہور میں پارٹی ورکرز اور بہبود آبادی کے افسران سے ملاقات کے دوران کیا۔صوبائی وزیر نے کہا کہ غربت اور جہالت آبادی میں بے پناہ اضافے کی بنیادی وجوہات ہیں جس پر صرف تعلیم کو فروغ دے کر ہی قابو پایا جا سکتا ہے۔

انہوں نے کہا کہ علماء کرام کو آبادی کو کنٹرول کرنے کے حوالے عوام میں آگہی پیدا کرنے کے لیے حکومت کی طرف سے کی جانے والی کوششوں میں اس کا ساتھ دینا چاہیے۔ان کا کہنا تھا کہ پنجاب حکومت نے اس مسئلے کی نوعیت کو سمجھتے ہوئے محکمہ بہبود آبادی کے بجٹ میں بھی اضافہ کیا ہے۔ہاشم ڈوگر نے کہا کہ صحت مند ماں اور صحت مند بچہ ہی ایک صحت مند خاندان کی بنیاد رکھتے ہیں جس کے لیے لوگوں میں شعور اجاگر کرنے کی ضرورت ہے۔