دنیا کا سب سے بڑا ریوبک کیوب تیار

ٹورنٹو(مانیٹرنگ ڈیسک) دنیا کا سب سے بڑا ریوبک کیوب تیار کر کے گنیز ریکارڈ قائم کر دیا گیا جسے ریوبک کیوب کی طرح حل بھی کیا جا سکتا ہے۔کینیڈا کے ٹیلس سپارک میوزیم کے فنکاروں نے 5 فٹ 6 انچ اونچا، 5 فٹ 6 انچ چوڑا اور 5 فٹ 6 انچ لمبا ریوبک کیوب تیار کر کے گنیز بک آف ورلڈ ریکارڈ میں اپنا نام درج کروایا ہے۔ اس انوکھے ریوبک کیوب کو مختلف عوامی میلوں میں نمائش کیلئے رکھا گیا جس میں لوگوں نے بڑی دلچسپی لی، خصوصاً بچوں کو تو اتنا پسند آیا کہ انھوں نے اسے حل کرنے کی بھی کوشش کی تاہم اتنا بڑا کیوب ان کے بس کا نہ تھا جس پر وہ صرف اسکو دیکھ کر ہی خوش ہوتے رہے۔

گنیز بک آف ورلڈ ریکارڈ انتظامیہ کی جانب سے اس ریوبک کیوب کا مکمل جائزہ لینے کے بعد اس ریکارڈ کی باقاعدہ تصدیق کی گئی ہے اور سرٹیفیکیٹ بھی جاری کر دیا گیا ہے۔