بابر کے سوا کوئی بلے باز افغان بولرز کا مقابلہ نہ کر سکا، پوری ٹیم 262 رنز پر ڈھیر

برسٹل(مانیٹرنگ ڈیسک) انگلینڈ کے خلاف حالیہ مایوس کن سیریز کے بعد پاکستان نے مشن ورلڈ کپ کا آغاز کر دیا ہے اور افغانستان کے خلاف پہلے وارم اپ میچ میں گرین شرٹس نے افغانستان کو جیت کے لیے 263 رنز کا ہدف دیا ہے۔ورلڈکپ 2019 کا باقاعدہ آغاز 30 مئی سے ہوگا تاہم اس سے قبل تمام ٹیمیں اپنے اپنے وارم اپ میچز کھیل رہی ہیں۔برسٹول کے کاؤنٹی گراؤنڈ میں کھیلے جا رہے میچ میں پاکستان کی جانب سے اننگز کا آغاز امام الحق اور فخر زمان نے کیا تاہم 47 کے مجموعی اسکور پر امام الحق 32 رنز بنا کر آؤٹ ہو گئے۔

فخر زمان بھی 19 رنز بنا کر محمد بنی کا شکار بن گئے جب کہ اسی اوور میں حارث سہیل بھی ایک رن بنا کر بولڈ ہو گئے۔ محمد حفیظ 12 رنز ہی بنا سکے۔پانچویں وکٹ کے لیے بابراعظم اور شعیب ملک کے درمیان 103 رنز کی اہم شراکت قائم ہوئی تاہم 44 کے انفرادی اسکور پر شعیب ملک ہمت ہار گئے۔

بابراعظم اعظم نے ایک بار پھر ذمہ دارانہ کھیل کا مظاہرہ کرتے ہوئے سنچری اسکور کی اور وہ 112 رنز بنا کر آؤٹ ہوئے۔قومی ٹیم کے کپتان سرفراز احمد ایک بار پھر جلد بازی کرتے ہوئے 13 رنز بنا کر اسٹمپڈ آؤٹ ہو گئے۔ عماد وسیم نے 18 اور حسن علی نے 6 رنز اسکور کیے۔

افغانستان کی جانب سے محمد بنی نے نپی تلی بولنگ کا مظاہرہ کرتے ہوئے 46 رنز دیکر تین کھلاڑیوں کو آؤٹ کیا جب کہ راشد خان اور دولت زدران نے دو دو کھلاڑیوں کو آؤٹ کیا۔گرین شرٹس 26 مئی کو اپنا دوسرا وارم اپ میچ بنگلادیش کے خلاف کھیلیں گے۔کپتان سرفراز احمد کا کہنا ہے کہ ورلڈ کپ جیتنا چاہتے ہیں، وہاب ریاض اور محمد عامر کی ٹیم میں شمولیت سے بولنگ اٹیک مضبوط ہوا ہے۔