کراچی میں متوقع بارشیں : ایئر پورٹ پر حفاظتی اقدامات یقینی بنانے کی ہدایات جاری

کراچی : محکمہ موسمیات کی جانب سے اگلے دو روز کے دوران تیز بارشوں کی پیش گوئی کے پیش نظر سول ایوی ایشن اتھارٹی نے کارگو کمپلیکس پر حفاظتی اقدامات کے حوالے سے ہدایات جاری کردیں۔

کراچی میں ممکنہ بارشوں کے حوالے سے کارگو ہینڈلنگ اور ائرلائن انتظامیہ کو خصوصی ہدایات دی گئیں ہیں جس میں سول ایوی ایشن انتظامیہ نے کہا ہے کہ ممکنہ بارشوں کے دوران متاثر ہونے والے سامان کی منتقلی کو یقینی بناتے ہوئے کارگو کمپلیکس میں پلاسٹک شیٹس، ترپال اور پانی کے رساؤ کے لیے دیگر انتظامات کیے جائیں۔

اس کے علاوہ درآمد و برآمد ہونے والی کروڑوں روپے کی اشیا کو خراب ہونے سے بچانے کے لیے ہنگامی بنیادوں پر انتظامات کو ممکن بنائیں۔

سول ایوی ایشن انتظامیہ کے مطابق بارشوں کے سبب کراچی ایئرپورٹ پر بھی حفاظتی اقدامات کو ممکن بنادیا گیا، تیز ہوائیں چلنے کے پیش نظر چھوٹے طیاروں کو وزن باندھ دیا گیا۔

جہازوں کے ٹیک آف اور لینڈنگ کے دوران کپتانوں کو احتیاط برتنے کی ہدایات جاری کی گئی ہیں، فائر بریگیڈ اور دیگر عملے کو بارشوں کے دوران مستعد رہنے کے احکامات بھی جاری کردیئے گئے۔