کرونا وائرس : تمام تعلیمی ادارے بند کرنے کا حکم جاری

ریاض : کرونا وائرس سے بچاؤ کیلئے اہم اقدام کرتے ہوئے سعودی حکومت نے تمام اسکولوں، کالجوں، سرکاری و نجی تعلیمی اداروں، یونیورسٹیوں کو عارضی طور پر بند کرنے کا اعلان کردیا۔تفصیلات کے مطابق سعودی عرب کی وزارت تعلیم نے محکمہ صحت کے حکام کی سفارش پر احتیاطی تدبیر کے طور پر تمام اسکولوں، سرکاری و نجی تعلیمی اداروں، یونیورسٹیوں اور تکنیکی اداروں کو عارضی طور پر بند کرنے کا اعلان کیا ہے۔اس فیصلے پر آج بروز پیر نو مارچ سے عمل درآمد کیا جائے گا، سعودی خبر رساں ایجنسی کے مطابق وزارت تعلیم نے تدریسی عمل کی معطلی کے دوران آن لائن ایجوکیشن پروگرام میں کہا ہے کہ یہ فیصلہ سرکاری و نجی سکولوں اور یونیورسٹیوں میں طلبہ و طالبات اور تدریسی و انتظامی عملے کی سلامتی اور صحت کے تحفظ کی خاطر کیا گیا ہے۔یہ پابندی سرکاری و نجی اسکولوں، تعلیمی اداروں، کالجوں، یونیورسٹیوں، سرکاری و نجی پیشہ ورانہ و تکنیکی تربیت جنرل کارپوریشن پر لاگو ہوگی۔

وزارت تعلیم نے عوام کو اطمینان دلایا ہے کہ تعلیمی اداروں کو بند کرنے کا فیصلہ وقتی اور احتیاطی تدابیر کے تحت کیا گیا ہے، اس حوالے سے کسی کو پریشان ہونے کجی ضرورت نہیں۔ترجمان نے ہدایت کی کہ تمام لوگ حفاظتی تدابیر کی پابندی کریں اور صحت کے حوالے سے ہدایات پر عمل کریں تاکہ کورونا وائرس کے پھیلاﺅ کو روکا جاسکے، تعلیم کی بحالی کے لیے متعلقہ کمیٹی نئی صورتحال کا جائزہ لیتی رہے گی۔