عید فطر ، اللہ تعالی کی عظمت اور جلالت کے سامنے بندگی اور شکر کا اظہار

جیسا کہ عید فطر کی نماز کی دعائے قنوت سے بھی عیاں ہے کہ اللہ تعالی صاحب کبریا ، صاحب عظمت اور صاحب جبروت ہے اور اللہ تعالی نے اس دن کو محمد اور آل محمد اور مسلمانوں کے لئے عید قراردیا ہے عید کا مطلب اللہ تعالی کی بارگاہ میں پاک و پاکیزہ ہوکر واپس آنے کا نام ہے ۔ انسان رمضان المبارک میں عبادت ، بندگی ، دعا اور مناجات اور اشک و آہ  کے ذریعہ  ہر قسم کی آلودگی سے پاک وپاکیزہ  ہوکر اللہ تعالی کی بارگاہ میں حاضر ہوتا ہے ۔ عید کا فلسفہ  اللہ تعالی کی عظمت اور جلالت کے سامنے بندگی اور عبودیت کا اظہار ہے ۔ انسان نے ایک ماہ تک اللہ تعالی کی رضا اور اس کی خوشنودی کے حصول کے لئے تلاش و کوشش کی اور آج اس کامیابی پر اللہ تعالی کا شکر و سپاس ادا کرنے کے لئے عید اور خوشی منا رہا ہے۔ یہ عید عبادت، بندگی اور پاکیزگی کی عید ہے ۔