بغیر کسی جرم کے ڈیڑھ سال صیہونی زندان میں گزارنے والا فلسطینی رہا

قابض صیہونی حکام نے فلسطینی نوجوان کو انتظامی حراست کی غیر قانونی پالیسی کے تحت زندان میں ڈالا تھا جو آج 16 ماہ قید کاٹنے کے بعد رہا کردیا گیا۔

مقبوضہ فلسطین میں اسیروں کی تفصیلات فراہم کرنےوالے ادارے کلب برائے اسیران کی جانب سے جاری کردہ بیان میں تصدیق کی ہے کہ آج صبح صیہونی فوج نے مقبوضہ بیت المقدس کے علاقے العیساویہ کے رہائشی محمد الکسوانی کو 16 ماہ بغیر کسی جرم کے انتظامی حراست کی غیر قانونی پالیسی کے تحت قید رکھنے کے بعد رہا کردیا ہے ۔

واضح رہے کہ اس وقت صیہونی زندانوں میں انتظامی حراست کی غیر قانونی پالیسی کےتحت بغیر کسی جرم کے گرفتار فلسطینیوں کی تعداد لگ بھک دو ہزار ہے جس میں سے سماجی کارکنان اور صحافیوں سمیت 50 سے زائد خواتین ہیں جبکہ 8 سو کے قریب بچے ہیں جن میں سے اکثریت کی عمریں 18 سال سے بھی کم ہیں ۔