ٹرمپ جلد ہنگامہ خیز واپسی کرنے جارہے ہیں ، ترجمان کا دعویٰ

واشنگٹن: سابق امریکی صدر ڈونلڈ ٹرمپ کے ترجمان کا دعویٰ ہے کہ ٹرمپ بہت جلد اپنی ذاتی سوشل میڈیا سائٹ / پلیٹ فارم سے دوبارہ منظر عام پر آئیں گے، ٹرمپ کے اکثر سوشل میڈیا اکاؤنٹس بند کیے جا چکے ہیں۔

بین الاقوامی میڈیا کے مطابق ایس ایچ ڈبلیو پارٹنرز کے پرنسپل جیسن ملر نے پیش گوئی کی ہے کہ سابق امریکی صدر ڈونلڈ ٹرمپ اپنی آن لائن موجودگی میں لاکھوں صارفین کو اپنی طرف راغب کریں گے۔

ملر ٹرمپ کی 2020 کی صدارتی مہم کے ترجمان تھے، انہوں نے اتوار کے روز ایک ٹی وی شو میں کہا تھا کہ ٹرمپ 2 سے 3 ماہ میں ایک نئی سوشل میڈیا سائٹ کے ساتھ سامنے آئیں گے جو سوشل میڈیا کے منظر نامے کو مکمل طور پر بدل دے گی۔

ٹرمپ اپنے دور صدارت سے پہلے اور اس کے دوران نہایت غیر ذمہ دارانہ انداز میں ٹویٹر استعمال کرتے رہے، لیکن 6 جنوری کو جب ان کے حامیوں نے کیپیٹل ہل کی عمارت پر دھاوا بولا اورٹرمپ ٹویٹر پر انہیں بڑھاوا دیتے رہے تو ان کا ٹویٹر اکاؤنٹ پہلے عارضی اور پھر مستقل طور پر بند کردیا گیا۔

ٹرمپ کا دور صدارت تنازعات سے بھرپور رہا اور ان کے دور میں امریکا میں نسلی منافرت، تعصب پسندی اور نسل پرست انتہا پسندی میں بے تحاشہ اضافہ ہوگیا۔