عراق کے پریس ذرائع نے اعلان کیا ہے کہ عوامی رضاکار فورس الحشدالشعبی نے کربلا کی آپریشنل کمان کے ساتھ مل کر سعودی عرب سے ملنے والے سرحدی علاقوں میں دہشت گردی کے خلاف بڑی کارروائی کی ہے۔
عراقی ذرائع کی رپورٹ کے مطابق عوامی رضاکار فورس الحشدالشعبی سے وابستہ امام علی ع ڈویژن نے ایک بیان میں اعلان کیا ہے کہ اس مشترکہ کارروائی کا مقصد نجف اشرف کے علاقے سے سعودی عرب سے ملنے والے سرحدی علاقوں میں تلاشی کی کارروائی انجام دینا ہے۔
دوسری جانب صوبے دیالہ کے شہر بعقوبہ کے شمالی مشرقی علاقے میں ہونے والے بم دھماکے میں عراقی سیکورٹی فورس کے چار اہلکار جاں بحق و زخمی ہو گئے۔
عراقی سیکورٹی فورس نے اس علاقے میں بھی تلاشی کی کارروائی شروع کردی۔
نومبر دو ہزار سترہ میں عراق میں داعش دہشت گرد گروہ کی شکست کے اعلان کے باوجود اس ملک کے بعض علاقوں میں دہشت گرد عناصر روپوش ہیں جو موقع ملنے پر دہشت گردانہ حملہ کر کے عراقی عوام میں خوف و ہراس کا ماحول پیدا کرنے کی کوشش کرتے ہیں تاہم عراقی فوج اور عوامی رضاکار فورس، عراق کے ان علاقوں سے داعشی باقیات کا بھی صفایا کرنے کی کوشش کر رہی ہے۔