بدھ , 1 دسمبر 2021

راشد خان کے استعفے کے بعد افغانستان نے نئے کپتان کا اعلان کردیا

افغانستان کرکٹ بورڈ نے ورلڈ ٹی ٹوئنٹی اسکواڈ کی قیادت سے راشد خان کے استعفے کے بعد نئے کپتان کا اعلان کردیا۔

افغان کرکٹ بورڈ کی جانب سے جاری اعلامیے کے مطابق راشد خان کی جگہ ٹی ٹوئنٹی ورلڈ کپ میں محمد نبی ٹیم کی قیادت کریں گے۔ باقی اسکواڈ میں کوئی تبدیلی نہیں کی گئی ہے۔

خیال رہے کہ افغان کرکٹر راشد خان ٹی ٹوئنٹی کرکٹ ٹیم کی قیادت سے دستبردار ہوگئے ہیں۔

راشد خان نے قیادت چھوڑنے کا فیصلہ افغانستان کرکٹ ٹیم کے ٹی ٹوئنٹی ورلڈکپ اسکواڈ کے اعلان کے چند گھنٹوں بعد کیا۔

راشد خان نے کہا کہ ورلڈکپ کیلئے اعلان کردہ ٹیم میں میری مشاورت شامل نہیں تھی بطور کپتان ٹیم کے انتخاب میں میری رائے ضروری تھی۔

انہوں نے مزید کہا کہ میں افغانستان کی ٹی ٹوئنٹی ٹیم کی قیادت چھوڑنے کا اعلان کرتا ہوں، افغانستان کیلئے کھیلنا ہمیشہ ایک اعزاز کی بات رہی ہے۔

خیال رہے کہ آئی سی سی ورلڈ ٹی ٹوئنٹی کا آغاز 17 اکتوبر سے یو اے ای میں ہوگا تاہم طالبان کی جانب سے خواتین کو کرکٹ سمیت کسی ایسے کھیل میں شمولیت کی اجازت نہ دینے جس میں جسم کی نمائش ہوتی ہو، کے بیان کے بعد تشویش کی لہر دوڑ گئی ہے۔

آسٹریلیا نے کہا ہے کہ اس بیان کے بعد افغانستان اور آسٹریلیا کے درمیان تاریخی ٹیسٹ میچ منسوخ کیا جاسکتا ہے جبکہ آسٹریلوی ٹیسٹ کپتان ٹم پین کا کہنا ہے کہ ٹیمیں اس وجہ سے ورلڈ ٹی ٹوئنٹی کا بائیکاٹ کرسکتی ہیں یا پھر ایونٹ میں افغانستان کیخلاف کھیلنے سے انکار کرسکتی ہیں۔

یہ بھی دیکھیں

میسی نے شاندار ہیٹ ٹرک کے ساتھ لیجنڈ پیلے کو پیچھے چھوڑ دیا

ارجنٹائن کے اسٹار فٹبالر لیونل میسی نے ایک اور اعزاز اپنے نام کرلیا، ورلڈ کپ …