ہفتہ , 28 مئی 2022

واٹس ایپ اسٹیٹس کے لیے بہترین فیچر کی آزمائش

اگر آپ واٹس ایپ پر بہت زیادہ اسٹیٹس اپ ڈیٹ کرتے ہیں تو اچھی خبر یہ ہے کہ دنیا کی مقبول ترین میسجنگ سروس میں اس کے حوالے سے ایک کارآمد فیچر پر کام کیا جارہا ہے۔

واٹس ایپ کی اپ ڈیٹس پر نظر رکھنے والی سائٹ WABetaInfo نے بتایا کہ اس نئے فیچر کی مدد سے صارفین فوری طور پر ایسی اسٹوری کو ان ڈو یا ہٹا سکیں گے جو حادثاتی طور پر یا غلط وقت پر پوسٹ ہوگی۔

رپورٹ میں بتایا گیا کہ کمپنی کی جانب سے ایک نئے ان ڈو بٹن کو اسٹیٹس اپ ڈیٹ کے برابر میں ٹیسٹ کیا جارہا ہے۔

اس بٹں کو کلک کرنے پر صارفین پوسٹ ہونے والے کسی اسٹیٹس کو فوری طور پر ہٹا سکیں گے۔

اس وقت کسی اسٹیٹس کو ہٹانے کے لیے صارفین کو پہلے تھری ڈاٹ مینیو میں جانا ہوتا ہے اور وہاں موجود آپشنز میں جاکر ڈیلیٹ پر ہٹ کرنا ہوتا ہے۔

ویسے تو یہ بھی غیر ضروری اسٹیٹس کو ہٹانے کا تیز رفتار ذریعہ ہے مگر نئے ان ڈو بٹن سے یہ کام برق رفتاری سے ہوسکے گا۔

یعنی اسی جگہ ان ڈو بٹن تک رسائی سے صارف چند سیکنڈ بچا سکے گا ورنہ دوسرے طریقہ کار میں کوئی دوسرا صارف اس حادثاتی اسٹیٹس کے اسکرین شاٹ لے سکتا ہے۔

یہ فیچر فی الحال بیٹا ورژن میں ہے اور وہ بھی صرف آئی او ایس ٹیسٹرز کے لیے، مگر رپورٹ میں بتایا گیا کہ آئی او ایس پر مزید بیٹا صارفین کو اس فیچر تک رسائی ہوگی اور اس کے بعد تمام صارفین کے لیے اسے متعارف کرایا جائے گا۔

اینڈرائیڈ صارفین کے لیے اس فیچر کی دستیابی کے بارے میں رپورٹ میں کچھ نہیں بتایا گیا مگر ممکنہ طور پر یہ مستقبل قریب میں واٹس ایپ کے اینڈرائیڈ بیٹا ورژن پر بھی دستیاب ہوگا۔

واضح رہے کہ اسٹیٹس فیچر میں صارفین تصاویر، جی آئی ایف یا ویڈیوز کو ایموجیز، ڈرائنگز اور کیپشن وغیرہ کے ساتھ شیئر کرسکتے ہیں جو کہ چوبیس گھنٹے بعد ختم ہوجاتی ہیں۔

یہ بھی دیکھیں

28 مئی کو سورج خانہ کعبہ کے عین اوپر ہوگا

28 مئی کو پاکستانی وقت کے مطابق دوپہر 2 بج کر 18منٹ پر سورج خانہ …