Iblagh News | حقائق تک رسائی اور ان کا ابلاغ
تہران: اسلامی جمہوریہ ایران کی وزارت خارجہ نے ایران کے دفاعی نظام کی طاقت و توانائی پر برطانیہ کے مداخلت پسندانہ بیان پر سخت رد عمل کا اظہار کیا ہے۔
اسلامی جمہوریہ ایران کی وزارت خارجہ کے ترجمان سعید خطیب زاده نے برطانیہ کے مداخلت پسندانہ موقف کو مسترد کرتے ہوئے کہا کہ ایران عالمی قوانین کے دائرے اور اپنے ملک کی دفاعی ضرورتوں کے پیش نظر اقدام کر رہا ہے اور برطانیہ کا اس قسم کا موقف نہ فقط ایران کے داخلی امور میں مداخلت ہے بلکہ لندن کی دوغلی پالیسی کا شاخسانہ بھی ہے۔
دوسری جانب قدس کی غاصب اور جابر صیہونی حکومت نے بھی ایران کے میزائلی تجربوں پر سخت رد عمل کا اظہار کیا ہے۔
واضح رہے کہ اسلامی جمہوریہ ایران کی سپاہ پاسداران انقلاب اسلامی نے پیغمبر اعظم (ص) 17 نامی مشق کا آخری مرحلہ کل مکمل کرلیا اور اس مرحلے میں ایک ہی ہدف پر 16 میزائل فائر کئے گئے جس سے ایران کے دشمنوں کی صفوں میں کھلبلی مچ گئی ہے۔
قابل ذکر ہے کہ سپاہ پاسداران انقلاب اسلامی نے پیر کے روز سے خلیج فارس اور آبنائے ہرمز میں صوبہ ہرمزگان، بوشہراور خوزستان کے ساحلی علاقوں میں، مشترکہ فوجی مشقوں کاآغاز کیا تھا جس میں بری ، بحری اور فضائی دستوں کے علاوہ عوامی رضاکار فورس بسیج کے بعض یونٹوں نے حصہ لیا۔
