بیت المقدس کے غاصبوں سے لڑنا فلسطینی عوام کا فطری حق ہے: ایران

تہران: اسلامی جمہوریہ ایران کی وزارت خارجہ کے ترجمان سعید خطیب زادہ نے کہا ہے کہ بیت المقدس کے غاصبوں سے لڑنا فلسطینی عوام کا فطری حق ہے۔ ایرانی وزارت خارجہ کے ترجمان نے مسجد الاقصی اور فلسطینی نمازیوں پر صہیونیوں کے دوبارہ وحشیانہ حملے کی مذمت کرتے ہوئے کہا کہ غاصب صہیونی حکومت روبزوال ہے اور غاصب صہیونی حکومت کا مقابلہ کرنا فلسطینی عوام کا قانونی ، جائزاور فطری حق ہے۔

خطیب زادہ نے بعض عرب اور مسلمان حکومتوں کیطرف سے اسرائیل کی غاصب حکومت کے ساتھ سفارتی تعلقات برقرار کرنے پر افسوس کا اظہار کر تے ہوئے کہا کہ مسلمان حکومتوں کے اس اقدام سے فلسطینیوں پر ظلم کرنے کے سلسلے میں اسرائيل کے حوصلے بلند ہوئے ہیں۔ انھوں نے کہا کہ اسرائيلی مظالم کا مقابلہ کرنے کے لئے مسلمانوں کو متحد اور اسرائیل کا مقابلہ کرنے کے سلسلے میں فلسطینیوں کو تنہا نہیں چھوڑنا چاہیے۔