کمزور مدافعتی نظام کی علامات کون سی ہیں؟

ماہرین کا کہنا ہے کہ ہمارا مدافعتی نظام جسمانی صحت برقرار رکھنے کے لیے 24 گھنٹے کام کرتا ہے اور یہ حیاتیات اور دیگر ماحولیاتی قوتوں کے حملے سے جسم کو محفوظ رکھتا ہے

اس کے علاوہ مدافعتی نظام جسم کو مختلف متعدی بیماریوں سے بچانے کے لیے اہم کردار ادا کرتا ہے اور اس کی بہتری سے موت کا خطرہ بھی کم ہوتا ہے۔ اس لیے یہ انسانی زندگی کی بقا کے لیے بہت ضروری ہے۔

لیکن جب مدافعتی نظام کمزور ہوتا ہے تو یہ جسم کو خطرناک بیماریوں سے بچانے کے لیے مؤثر انداز میں کام نہیں کر سکتا۔

*مدافعتی نظام کی کمزوری کی علامات*

اگر آپ کو بار بار نزلہ ہو رہا ہے یا نزلے کی علامات دوبارہ آرہی ہیں تو اس سے معلوم ہوتا ہے کہ آپ کا مدافعتی نظام کمزور ہے، سردی اور اس سے پیدا ہونے والا انفیکشن اکثر 7 سے 10 دن میں ٹھیک ہوجاتی ہیں۔

مدافعتی نظام کی بیماریاں مدافعتی نظام کی سرگرمی کو متاثر کرنے کا سبب بن سکتی ہیں۔

اگر یہ نظام ضرورت سے زیادہ متحرک ہو تو جسم اپنے ٹشوز کو نقصان پہنچانا شروع کردیتا ہے، جس سے آٹو امیون بیماریاں جنم لیتی ہیں اور یہ بیماریاں جسم کی دیگر بیماریوں کا مقابلہ کرنے کی صلاحیت کم کرتی ہیں۔

کمزور مدافعتی نظام بچوں کی کمزور نشوونما کا باعث بنتا ہے، لہٰذا اگر آپ نے محسوس کیا کہ آپ کا بچے کا جسم معمول کے مطابق نہیں بڑھ رہا ہے تو آپ کو ڈاکٹر سے بچے کا معائنہ کروانے کی ضرورت ہے۔

بعض اوقات نشوونما میں تاخیر ناقص خوراک کی وجہ سے بھی ہوتی ہے، اگر ایسا ہی ہے تو ماہر اطفال آپ کے بچے کے لیے مناسب پروٹین سے بھرپور غذا تجویز کرے گا۔ ان کی غذا میں وٹامن اے، وٹامن سی اور وٹامن بی سمیت تمام ضروری غذائی اجزا شامل ہونے چاہئیں۔

خون کی کچھ بیماریاں بھی کمزور مدافعتی نظام کی نشاندہی کرتی ہیں جن میں ہیموفیلیا، انیمیا، خون کا جمنا اور خون کا کینسر جیسے لیمفوما، لیوکیمیا، اور مائیلوما شامل ہیں۔

ہماری جلد جراثیم سے لڑنے میں سب سے پہلی رکاوٹ ہے، اس کی ظاہری شکل سے ظاہر ہوتا ہے کہ جسم کا مدافعتی نظام کس طرح کام کر رہا ہے۔ جلد پر بار بار خارش ہونا یا خشک جلد سوزش کی علامت ہے اور ہو سکتا ہے کہ آپ کا مدافعتی نظام بھی کمزور ہو۔

اعضا کی سوزش جسم کی قوت مدافعت کو بھی سست کر سکتی ہے جس کی وجہ خلیوں کا انفیکشن، بیکٹیریا، ٹراما یا گرمی ہو سکتی ہے۔ جسم میں کسی قسم کی چوٹ سوزش کا باعث بن سکتی ہے اور یہ کمزور مدافعتی نظام کی علامت ہے۔

اگر آپ نے محسوس کیا کہ جلد پر آپ کے زخم ٹھیک ہونے میں معمول سے زیادہ وقت لے رہے ہیں تو اس کا مطلب ہے کہ آپ کا مدافعتی نظام کمزور ہے۔ مدافعتی نظام جلد کو شفا بخش اور مؤثر بیکٹیریا یا جراثیم سے لڑنے میں مدد کرتا ہے، جبکہ انفیکشن کا خطرہ کم کرتا ہے۔

روز مرہ کی زندگی میں سخت محنت کے بعد تھکاوٹ محسوس ہونا معمول ہے، لیکن اگر کافی آرام ملنے کے بعد بھی تھکاوٹ برقرار رہتی ہے تو یہ مدافعتی نظام کی کمزوری کی علامت ہوسکتی ہے۔