امریکہ: سفید فام قوم پرست فسادات کی سازش کے الزام میں گرفتار

امریکی ریاست ایڈاہو میں پولیس نے سفید فام قوم پرست گروپ ‘پیٹریاٹ فرنٹ‘ کے 31 ارکان کو فسادات کی سازش کرنے کے الزام میں گرفتار کر لیا ہے۔ یہ کارروائی ایک مقامی شہری کی اطلاع پر کی گئی۔
سفید فام قوم پرستوں کا یہ گروہ ہفتے کے روز ریاست ایڈاہو کی کوتینائئی کاؤنٹی میں پرائیڈ پریڈ کے موقع پر فسادات کی سازش کیے ہوئے تھا۔

پولیس کے مطابق ایک مقامی شہری نے اس گروہ کے ارکان کو جمع ہوتے دیکھ کر پولیس کو اطلاع کر دی، جس کے نتیجے میں بروقت گرفتاریاں ممکن ہوئیں۔

کورڈالن شہر کے پولیس چیف لی وائٹ نے رپورٹرز کو بتایا کہ فی الوقت گرفتار افراد کے خلاف فسادات کی سازش تیار کرنے سے متعلق دفعات لگائی گئی ہیں تاہم بعد میں مزید دفعات بھی شامل کی جا سکتی ہیں۔

اب تک ہمیں کیا معلوم ہے؟
پولیس کے مطابق ایک مقامی رہائشی نے پولیس کو فون کیا اور بتایا کہ ایک ہوٹل کی پارکنگ میں یوں دکھائی دے رہا ہے جیسے ‘فوجی ایک ٹرک میں سوار‘ ہو رہے ہیں۔

اشتہار

پولیس نے اطلاع ملنے کے دس منٹ بعد ہی ٹرک کو روک لیا۔ اس ٹرک میں 31 افراد سوار تھے جن کے پاس موجود سامان اور آپریشن کی منصوبہ بندی کے بارے میں دستاویزات سے واضح تھا کہ وہ ہنگامہ آرائی کی مکمل تیاری کیے ہوئے تھے۔میڈیکل کی کتابوں میں صرف سفید فام لوگوں کے ہی خاکے کیوں؟
پولیس چیف نے یہ بھی بتایا کہ گرفتار کیے گئے افراد امریکہ کی گیارہ مختلف ریاستوں سے آئے تھے جب کہ ان میں سے صرف ایک شخص ریاسٹ ایڈاہو کا رہائشی تھا۔

گرفتاری کے وقت ریکارڈ کی گئی ایک ویڈیو میں دیکھا جا سکتا ہے کہ یہ لوگ ایک سی خاکی پتلونیں اور نیلی شرٹس پہنے ہوئے تھے جن پر ‘ری کلیم امریکہ‘ لکھا ہوا تھا۔

امریکہ میں نفرت انگیزی پھیلانے اور دہشت گردی کا ارتکاب کرنے والے گروہوں پر نظر رکھنے والی ایک تنظیم نے ‘پیٹریاٹ فرنٹ‘ کی درجہ بندی نفرت انگیزی پھیلانے والی تنظیم کے طور پر کر رکھی ہے۔

یہ تنظیم سن 2017 میں بنائی گئی تھی اور اس کے منشور میں امریکہ کو صرف سفید فاموں پر مبنی ملک بنانا شامل ہے۔