بدھ , 28 ستمبر 2022

شاہ محمود قریشی نے آصف زرداری سے ملاقات کی تردید کردی

پاکستان تحریک انصاف کے رہنما شاہ محمود قریشی نے سابق صدر آصف علی زرداری کے ساتھ ملاقات کی رپورٹس کو یکسر مسترد کردیا ہے۔

سابق وزیر خارجہ نے کہا کہ پی ٹی آئی کے منحرف رکن راجا ریاض نے یہ ’جعلی خبر‘ پھیلائی۔

ان کا کہنا تھا کہ وہ پاکستان پیپلز پارٹی کے شریک چیئرمین سے ملاقات کا سوچ بھی نہیں سکتے۔

شاہ محمود قریشی کا مزید کہنا تھا کہ وہ ملتان میں اپنے بیٹے کی انتخابی مہم میں مصروف ہیں اور لاہور نہیں گئے تھے جہاں اتوار کے روز آصف زرداری موجود تھے۔

انہوں نے چند روز قبل ہی ایک جلسے میں خطاب کرتے ہوئے کہا تھا کہ 2018 کے انتخابات میں ان کی پنجاب اسمبلی کی نشست پر ناکامی کے پیچھے خود ان کی پارٹی تھی۔

تاہم انہوں نے اس حوالے سے کسی کا نام نہیں لیا تھا۔

اس کے علاوہ انہوں نے ہفتہ کے روز اسلام آباد میں ہونے والے پی ٹی آئی کے جلسے میں بھی شرکت نہیں کی تھی جس میں عمران خان اور پارٹی کے دیگر رہنماؤں نے خطاب کیا تھا۔

خیال رہے کہ راجا ریاض نے ایک ٹوئٹ میں دعویٰ کیا تھا کہ شاہ محمود قریشی کی بلاول بھٹو اور آصف علی زرداری کے ساتھ دو گھنٹے طویل ملاقات ہوئی۔

انہوں نے اپنے دعوے میں یہ بھی کہا تھا کہ آخری اطلاعات تک شاہ محمود قریشی کی معافی قبول کرلی گئی ہے اور وہ جلد پی ٹی آئی چھوڑنے کا اعلان کریں گے۔

یاد رہے کہ سابق وزیراعظم عمران خان کے خلاف تحریک عدم اعتماد سے قبل راجا ریاض سمیت پی ٹی آئی کے 2 درجن اراکین قومی اسمبلی نے اپوزیشن کی حمایت اختیار کرلی تھی۔

بعدازاں 10 اپریل کو 342 اراکین پر مشتمل ایوان میں 174 اراکین کی حمایت سے عمران خان کے خلاف اپوزیشن کی تحریک عدم اعتماد کامیاب ہوگئی تھی۔

جس کے نتیجے میں بننے والے اتحادی حکومت میں راجا ریاض قومی اسمبلی میں قائد حزب اختلاف بن گئے تھے

یہ بھی دیکھیں

آرمی چیف کی تقرری کا فیصلہ وزیراعظم کریں، بلاول

نیویارک:وزیر خارجہ بلاول بھٹو زرداری کا کہنا ہے کہ نئے آرمی چیف کی تقرری کا …