مال بردار جہاز جو برج خلیفہ کی بلندی کو چھو سکتے ہیں

لیکن گرفتھس کہتے ہیں کہ یہ جہاز دنیا کی سب سے بڑی بندرگاہوں کو بھی مشکل میں ڈال دیتے ہیں۔ ان سے سامان اتارنے اور لادنے کے لیے کرینز کو جہاز کی دوسری جانب تک رسائی درکار ہوتی ہے۔ ان جہازوں کو بھی سوئز اور پانامہ کینال جیسے مقامات سے گزرنا پڑتا ہے جہاں کئی مشکلات کا سامنا کرنا پڑتا ہے۔

یہ بھی نہایت ضروری ہے کہ یہ جہاز سمندر کی تہہ کو نہ چھو جائیں۔

یونیورسٹی آف پلائےموتھ میں میری ٹائم ٹرانسپورٹ ریسرچ گروپ کے سربراہ سٹیورس کرمپیریڈس کہتے ہیں کہ چند پورٹس یا بندر گاہوں میں یہ بڑے مال بردار جہاز پانی میں اتنی گہرائی تک پہنچ جاتے ہیں کہ تیرنے کی بجائے یہ تہہ پر پھسل رہے ہوتے ہیں۔ ایسی نقل و حرکت کے دوران مہارت کی ضرورت ہوتی ہے۔

آج کی دنیا میں موجود جہازوں سے بھی بڑے حجم کے کنٹینر شپ بنانے کے لیے موجودہ بندرگاہوں کے نظام کو بھی بہتر کرنا ہو گا۔ اور گرفتھس کہتے ہیں کہ یہ نہایت مہنگا عمل ثابت ہو گا۔

’آپ ایسے جہازوں میں پیسہ کیوں لگانا چاہیں گے جس کا مطلب یہ ہو گا کہ آپ کو ایک خطیر سرمایہ بندرگاہوں پر بھی خرچ کرنا پڑے گا؟‘

سٹیورس کرمپیریڈس کہتے ہیں کہ بڑے جہاز ہر جگہ جانے کی اہلیت بھی نہیں رکھتے کیوں کہ ان پر موسمی حالات کا اثر بھی زیادہ ہوتا ہے۔ مثال کے طور پر یہ جہاز بحر الکاہل میں سفر نہیں کرتے جہاں ان کو شدید طوفانوں کا سامنا کرنا پڑ سکتا ہے۔ درمیانے حجم کے مال بردار جہاز اکثر بحرالکاہل میں سینکڑوں کنٹینرز کھو دیتے ہیں۔

سٹیورس کرمپیریڈس کے مطابق یہ جہاز ساحل کے قریب آ جاتے ہیں تاکہ ان کو زیادہ بڑی لہروں کا سامنا نہ کرنا پڑے۔ ’یہ استحکام کی بات ہے۔‘

وہ کہتے ہیں کہ زیادی تر امریکی بندرگاہیں بھی اتنی بڑی نہیں ہیں کہ وہ دنیا کے سب سے بڑے کنٹینر جہازوں کو سنبھال سکیں۔ اب تک 20000 سے زیادہ کی صلاحیت رکھنے والے چند ہی جہاز امریکی بندرگاہوں پر آئے ہیں۔

آپ کو شاید ایک بات کا احساس ہوا ہو۔ ان جہازوں کو بنانے میں کسی قسم کا بڑا چیلنج نہیں بلکہ اصل مسئلہ ان دیوہیکل جہازوں کو چلانے کا ہے۔

سولس میرین کنسلٹنٹس کی نیول آرکیٹکٹ اور مینجنگ پرٹنر روزالنڈ بلیزجزک کے مطابق ’حجم کے حساب سے کوئی حد نہیں ہے‘ لیکن وہ کہتی ہیں کہ ’کسی بھی جہاز پر ایک حد تک ہی کنٹینر لادے جا سکتے ہیں کیوں کہ ایک موقع ایسا ضرور آئے گا جب سب سے نیچے موجود کنٹینر وزن کی تاب نہیں لا سکے گا۔‘

روزالنڈ بلیزجزک کے ساتھی جون سمپسن کہتے ہیں کہ کنٹینرز کو ایک جگہ رکھنے کے لیے باندھا بھی جاتا ہے اور اس صلاحیت کے حامل نظام کی بھی ایک حد ہے کہ وہ کتنے کنٹینرز کو محفوظ رکھ سکتا ہے۔

ایک اور مسئلہ یہ بھی ہے کہ اتنے بڑے اور چوڑے جہاز کس طرح سمندری لہروں کا مقابلہ کرتے ہیں۔

جب کسی بھی جہاز کو سامنے سے آنے والی سمندی لہروں کا سامنا ہو تو پیرا میٹرک رولنگ ہو سکتی ہے۔ یہ اس لیے ہوتا ہے کہ جب کسی نہایت چوڑے جہاز کے ساتھ سمندری لہر گزرے تو جہاز کا اگلا اور پچھلا حصہ اس وقت پانی سے باہر ہوتا ہے جب یہ لہر جہاز کے درمیان میں سے گزر رہی ہوتی ہے۔ ایسے میں جہاز ادھر ادھر لہرانا شروع کر دیتا ہے۔

روزالنڈ بلیزجزک کہتی ہیں کہ ’ایسا ہونے کے لیے بہت بڑی سمندری لہر کی ضرورت نہیں۔‘

جہاز کا حجم جتنا بڑا ہو گا، یہ خطرہ اتنا ہی بڑھتا جاتا ہے۔ اہم بات یہ ہے کہ مجموعی طور پر بڑے جہاز چھوٹے جہازوں کی نسبت کمزور ہوتے ہیں ۔

روزالنڈ بلیزجزک کہتی ہیں کہ ’یہ ایسے ہی ہوتے ہیں جیسے جوتے کا ڈبہ ہو لیکن اوپر سے کھلا ہوا ہو۔‘ پرسکون سمندر میں ان کو کسی مسئلے کا سامنا نہیں ہوتا لیکن مقام اور وقت کے حساب سے اس جہاز کی افادیت کم ہو سکتی ہے۔