بدھ , 28 ستمبر 2022

سمرقند:چینی صدر کی وزیر اعظم شہباز شریف سے ملاقات:دوطرفہ امور پر تبادلہ خیال

اسلام آباد: وزیراعظم شہباز شریف کی چینی صدر شی جن پنگ سے سمرقند میں ملاقات کا اعلامیہ جاری کردیا گیا، وزراتِ عظمی کا منصب سنبھالنے کے بعد چین کے صدر کے ساتھ وزیر اعظم شہباز شریف کی یہ پہلی ملاقات ہے۔

چینی صدر نے وزیر اعظم محمد شہباز شریف کو ’’عملیت پسندی اور کارکردگی کا حامل شخصیت‘‘ قرار دیا۔ چینی صدر نے کہا کہ وزیر اعظم ’’چین پاکستان دوستی کے لیے دیرینہ عزم‘‘ رکھنے والے رہنما ہیں۔

دونوں رہنماؤں نے دو طرفہ تعلقات کے تمام پہلوؤں کا جائزہ لیا اور باہمی دلچسپی کے اہم علاقائی اور بین الاقوامی امور پر تبادلہ خیال کیا۔ وزیر اعظم نے صدر شی جن پنگ اور کمیونسٹ پارٹی کی آئندہ 20 ویں سی پی سی قومی کانگریس کے لیے نیک خواہشات کا اظہار کیا۔

وزیر اعظم نے کہا کہ تنظیم علاقائی تعاون اور یکجہتی کے ٹھوس عملی منصوبوں میں آگے بڑھانے کے لیے ایک بہترین فورم ہے، ہماری آل ویدر اسٹریٹجک کوآپریٹو پارٹنرشپ اور آہنی بھائی چارے نے وقت کی کسوٹی کا مقابلہ کیا۔

دونوں رہنماؤں کا دوطرفہ تعلقات کو مزید بلندیوں تک لے جانے کے اپنے ذاتی عزم کا اعادہ کیا۔ وزیراعظم نے سیلاب سے متاثرہ افراد کی فراخدلانہ اور بروقت مدد پر شکریہ ادا کیا۔

وزیر اعظم نے صدر شی جنگ پی کے ساتھ 5 ستمبر 2022ء کو صوبہ سیچوان میں آنے والے زلزلے سے ہونے والے المناک جانی نقصان اور تباہی پر اظہار تعزیت اور کہا کہ پاکستان کی حکومت اور عوام اس قدرتی آفت کے دوران چین کے ساتھ کھڑے ہیں۔

وزیراعظم نے پاکستان کی سماجی و اقتصادی ترقی پر سی-پیک کے تبدیلی کے اثرات کو سراہا۔ وزیر اعظم نے سی پیک کی ترقی کے لیے اپنی حکومت کے عزم کا اعادہ کیا۔

دونوں رہنماؤں نے ایم ایل ون ریلوے منصوبے کے فریم ورک معاہدے کے پروٹوکول پر دستخط کا خیرمقدم کیا۔ وزیراعظم نے تائیوان، تبت، سنکیانگ اور ہانگ کانگ سمیت بنیادی مفاد کے تمام مسائل پر پاکستان کی چین کے ساتھ مستقل اور غیر متزلزل حمایت کا اعادہ کیا۔

وزیراعظم نے پاکستان کی خودمختاری اور علاقائی سالمیت، ایف اے ٹی ایف، قومی ترقی، کوویڈ 19 وبائی امراض اور دیگر شعبوں میں تعاون پر چینی حکومت کا شکریہ ادا کیا۔

شہباز شریف نے کہا کہ موسمیاتی تبدیلی، وبائی امراض اور بڑھتی ہوئی عدم مساوات جیسے چیلنجز سے اقوام متحدہ کے چارٹر کے مطابق تمام اقوام کے تعاون سے ہی نمٹا جا سکتا ہے۔

وزیراعظم نے جموں و کشمیر کے تنازع پر چین کے اصولی موقف کا شکریہ ادا کیا۔ دونوں رہنماؤں نے مشترکہ مستقبل کے لیے پاک چین کمیونٹی کی تعمیر کے عزم کا اعادہ کیا۔ وزیراعظم نے صدر شی جن پنگ کو پاکستان کا سرکاری دورہ کرنے کی دعوت بھی دی۔

یہ بھی دیکھیں

پنجاب میں تعلیمی اداروں میں منشیات فروشی پر عمرقید کی سزا کیلئے قانون سازی

لاہور:چیئرمین پاکستان تحریک انصاف اور سابق وزیراعظم عمران خان ایک روزہ دورے پر لاہور ہیں، …