بدھ , 28 ستمبر 2022

امپورٹڈ وزیراعظم بیرون ملک مانگنے کے بجائے اپنا پیسہ ملک میں لائیں: عمران خان

چکوال:پاکستان تحریک انصاف کے چیئر مین اور سابق وزیراعظم عمران خان نے کہا ہے کہ مریم نواز بڑے سیدھے منہ سے جھوٹ بولتی ہے۔ کبھی اتنے سیدھے منہ سے کسی کوجھوٹ بولتے نہیں دیکھا۔ وزیراعظم نے امریکی دورے میں کونسا معرکہ مارنا ہے۔ ترجمان پاک فوج سے سوال پوچھتا ہوں آرمی چیف کی تعیناتی سے متعلق آپ نے کم از کم سمجھ تو جانا تھا میں کیا کہہ رہا ہوں۔

چکوال میں پاکستان تحریک انصاف کے جلسے سے خطاب کرتے ہوئے سابق وزیراعظم نے کہا کہ چکوال والوں کے جنون کوسلام پیش کرتا ہوں، جلسے میں خواتین کی بڑی تعداد موجود ہے،جب چکوال کو کال دوں گا تو نوجوان، بزرگ، خواتین نے حقیقی آزادی کے لیے سب نے نکلنا ہے،گزشتہ رات تیسری ٹیلی تھون کی، تین ٹیلی تھون کے دوران 14 ارب میری قوم نے مجھے دیا، دنیا میں پاکستانیوں سے زیادہ کھلے دل کے لوگ نہیں۔

انہوں نے مزید کہا کہ سندھ، بلوچستان میں متاثرین کو مشکلات کا سامنا ہے،سندھ میں لوگوں کی فصلیں تباہ ہو چکی ہیں، کھڑے پانی کی وجہ سے کسان گندم کی فصل بھی نہیں اُگا سکیں گے۔ چودہ سال سے سندھ میں پیپلزپارٹی کی حکومت ہے، دریائے سندھ کے ساتھ رائٹ بینک کینال کو تاحال سندھ حکومت مکمل نہیں کر سکی، سندھ کے ڈاکوؤں نے رائٹ بینک کینال کا پیسہ چوری کر کے دبئی بھیجا، سندھ کے غریب کسانوں کا برا حال ہے، شہباز شریف کی بے حسی دیکھیں ملک میں سیلاب اور بیرون ملک دورے کر رہا ہے۔

پی ٹی آئی چیئر مین کا کہنا تھا کہ وزیراعظم نے امریکی دورے میں کونسا معرکہ مارنا ہے، ملک میں سیلاب اور شہبازشریف باہر چلا گیا، بلاول بھٹو، دیسی ولایتی وہ بھی منہ اٹھا کر باہرچلا گیا، اگر باہر جانا تھا تو پاکستان کی عزت میں اضافہ ہی کر دیتے، شہبازشریف کی سمرقند میں روس کے صدرکے ساتھ ملاقات ہوئی، امپورٹڈ وزیراعظم کوسازش کے تحت لایا گیا۔

عمران خان کا مزید کہنا تھا کہ 100شیروں کی فوج کا سردار گیدڑ ہو وہ ہار جائے گی، امپورٹڈ وزیراعظم بیرون ملک مانگنے کے بجائے اپنا پیسہ ملک میں لائیں، 30 سال سے لوٹا ہوا پیسہ زرداری، نوازشریف، شہباز شریف آدھا بھی واپس لے آئیں تو مانگنے کی ضرورت نہ پڑے، بھٹو ایک خود دار لیڈر تھا اس وقت بھٹو کو سازش کر کے پھانسی پر چڑھایا گیا، بھٹو بھی آزادی کی بات کرتا تھا، امپورٹڈ حکومت کو بیرونی سازش اور ہینڈلرز لیکر آئے۔ شہبازشریف کی ساری ترقی اشتہارات کے اندر ہوتی تھی، شہبازشریف نے پنجاب سپیڈ کے ڈرامے کر کے اربوں خرچ کیے، سیکرٹری جنرل اقوام متحدہ کو کہتا ہے پیسہ چوری نہیں کریں گے ٹھیک خرچ کریں گے۔

سابق وزیراعظم کا کہنا تھا کہ اقوام متحدہ رپورٹ کے مطابق غریب ممالک کے سربراہ پیسہ چوری کر کے لندن میں بڑے بڑے محلات خریدتے ہیں، سیکرٹری جنرل اقوام متحدہ کو شہبازشریف بارے سب کچھ پتا ہے، سیکرٹری جنرل کو پتا ہے 60 فیصد کابینہ ضمانت پر ہے، کبھی کوئی چوروں کوبھی پیسہ دیتا ہے، شہبازشریف اور اس کے بیٹے کو سزا ہونے والی تھی، مقصود چپڑاسی کے اکاؤنٹ میں اربوں روپے بھیجے گئے، وزیراعظم کے کیس میں سارے گواہان ہارٹ اٹیک سے مر گئے، آج دنیا کیوں پیسے نہیں دے رہی انہیں پتا ہے، سازش کے تحت ڈاکوؤں کو اقتدارمیں بٹھادیا ہے، 8گھنٹے کے دوران قوم نے مجھے 14 ارب دیئے، قوم کو پتا ہے میرا جینا مرنا اور سب کچھ پاکستان میں ہے۔

پی ٹی آئی چیئر مین کا کہنا تھا کہ چکوال والوں میں نے کال دینی ہے چوروں کو شکست دینے کے لیے نکلنا ہے، کرکٹ میں ایک چیز سیکھی جو شخص ہار نہیں مانتا اسے کوئی شکست نہیں دے سکتا، میں نے زندگی میں کبھی ہار نہیں مانی، انہوں نے بیرونی سازش کے تحت حکومت گرائی تو سمجھ رہے تھے چُپ کر کے بیٹھ جاؤں گا، اپنے پاؤں پر کھڑا ہو کر اقتدار تک پہنچا تھا، میں نوازشریف کی طرح جنرل جیلانی کے گھر سریا لگا کر وزیراعظم نہیں بنا تھا، ہمارے نبیﷺ دنیا کے سب سے عظیم لیڈر تھے، تحریک کے لیے نکلنے لگا ہوں کبھی چوروں کو تسلیم نہیں کروں گا، جب تک میرے اندرخون ہے کبھی ان کوتسلیم نہیں کروں گا۔

انہوں نے کہا کہ ہماری حکومت میں دیسی، ولایتی بلاول اورڈیزل نے مہنگائی مارچ کیے، ہماری حکومت میں انہوں نے مارچ کیے ہم نے کوئی مقدمات درج نہیں کیے۔ عدم اعتماد کے دوران ڈالر 178 روپے کا تھا، ہماری حکومت میں پٹرول، ڈیزل 150 روپے لٹر تھا، عالمی منڈی میں تیل کی قیمتیں کم ہونے کے باوجود پڑول، ڈیزل کی قیمتیں زیادہ ہے، ہمارے دورمیں بجلی کا فی یونٹ 16، آج یونٹ ٹیکس ملا کر 50 روپے تک چلا گیا، آئی ایم ایف کے مطابق سردیوں میں گیس 250 فیصد بڑھے گی، آج ملک میں آٹا، چاول کی قیمت کدھرچلی گئی ہے، یہ مہنگائی کم کرنے آئے تھے پانچ ماہ میں ریکارڈ ٹوٹ گئے، آج لوگ مہنگائی میں پِسے ہوئے ہیں آج میڈیا کیوں خاموش ہے، پاکستانیوں آپ کو بتانا چاہتا امریکیوں کے ساتھ مل کریہاں کے غداروں نے کتنی بڑی سازش کی۔ موجودہ حکومت کےاکنامک سروے کے مطابق 17 سال بعد تحریک انصاف حکومت میں 6 فیصد معاشی گروتھ ہورہی تھی، سترہ سال بعد ملک کی انڈسٹری میں 11 فیصد اضافہ ہوا، ہمارے دورمیں چاربڑی فصلوں کی ریکارڈ پیداوارہوئی۔ ہمارے دورمیں سستی کھاد، ٹیوب ویل کا یونٹ ساڑھے 8 اور آج 38 روپے یونٹ ہے۔

سابق وزیراعظم کا کہنا تھا کہ آج مہنگائی، بجلی کی قیمتیں آسمانوں پر چلی گئیں، ہر غدارسے سوال پوچھتا ہوں جنہوں نے امپورٹڈ حکومت ہمارے اوپر مسلط کی، ملکی حالات کا ذمہ دار کون ہے، آج روپے کی قدرمسلسل گِر رہی ہے، روپے کی قدرگرنے سے ملک کی صنعتیں بند ہو رہی ہیں، ہمارے دورمیں ریکارڈ ڈالرملک میں آرہے تھے۔ مسلم لیگ کی گزشتہ حکومت 20 ارب ڈالر کا خسارہ چھوڑ کر گئی تھی، ہماری حکومت بیرونی خسارے کو 16 ارب ڈالر تک لیکر آئی، ہمارے دور میں فیصل آباد کے اندر مزدور نہیں مل رہے تھے، آج 20 فیصد ٹیکسٹائل سیکٹر بند ہو چکا ہے، پاکستان کے ساتھ ظلم کرنے والے غداروں کو قوم اوراللہ بھی معاف نہیں کریں گے، مہنگائی کی وجہ سے غریب آدمی تکلیف میں ہے۔

عمران خان نے کہا کہ میں نے کہا آرمی چیف کو میرٹ پر سلیکٹ ہونا چاہیے، جس قوم میں میرٹ ہوتا ہے وہ ہمیشہ آگے نکل جاتے ہیں، میں نے کہا زرداری، نوازشریف کبھی میرٹ پر سلیکٹ نہیں کر سکتے، دونوں کو اپنے خاندان کے علاوہ نظر نہیں آتا، زرداری، نوازشریف انہیں کیا پتا میرٹ کیا ہوتا ہے، دیسی، ولایتی بلاول کا اعتزاز احسن سے کیا مقابلہ ہے، اگر پیپلزپارٹی میں میرٹ ہوتا توآج اعتزازاحسن پیپلزپارٹی میں آگے ہوتا، اگر(ن)لیگ میں میرٹ ہوتا تو آج حمزہ ککڑی آگے نہ ہوتا، اگر ن لیگ میں میرٹ ہوتا تو مریم نواز شہزادی نہ بنتی، چودھری نثار پارٹی میں میرٹ نہ ہونے کی وجہ سے الگ ہوا۔

اپنی بات کو جاری رکھتے ہوئے انہوں نے کہا کہ زرداری، نوازشریف چور اربوں روپے لوٹ کر باہر لے گئے، جس ملک میں ان کے پیسے پڑے ہیں یہ ان کے غلام ہیں، حسن شریف دس ارب کے گھر کی ایک رسید نہیں دکھا سکا، زرداری کی چوری پر بیرون ممالک اخبارات میں مضمون لگے، کیا ایسے لوگ پاکستان کا آرمی چیف سلیکٹ کریں گے؟ کیا ان لوگوں کو آپ سلیکٹ کرنے دیں گے، نوازشریف جھوٹ بول کر ملک سے مفرورہے، نوازشریف مشرف دورمیں بھی جھوٹ بول کر باہرگیا تھا، ن لیگی قائد جھوٹ بول کر بیماری کا بہانہ بنا کر باہربھاگ گیا تھا، شہبازشریف نے عدالت میں بیان حلفی دیا تھا واپس آئے گا، نوازشریف جھوٹا، مفرور بھی ہے کیا یہ آرمی چیف سلیکٹ کرے گا؟

پی ٹی آئی چیئر مین کا کہنا تھا کہ ڈی جی آئی ایس پی آرسے سوال پوچھتا ہوں آپ نے کم از کم سمجھ تو جانا تھا میں کیا کہہ رہا ہوں، قوم ان چوروں کو کبھی آرمی چیف سلیکٹ نہیں کرنے دے گی، نوازشریف کی بیٹی کی سب سے بڑی صفت جھوٹ بولنے میں پی ایچ ڈی حاصل کی ہوئی ہیں۔ مریم تواتنی غربب بیچاری اس نے احساس پروگرام میں درخواست دی ہوئی ہے، مریم توکہتی تھی لندن توکیا پاکستان میں بھی کوئی پراپرٹی نہیں، پناما انکشافات کے دوران سارا سچ سامنے آگیا۔ لندن کے اربوں کے محلات مریم نواز کے نام تھے، مریم نواز بڑے سیدھے منہ سے جھوٹ بولتی ہے، کبھی اتنے سیدھے منہ سے کسی کوجھوٹ بولتے نہیں دیکھا، مریم کہتی ہیں میرا دادا اربوں پتی تھا، شہبازشریف باپ متعلق کہتا ہے میرے والد کا تعلق غریب کسان گھرانے سے تھا، اتنا بڑا جھوٹ بولتے کسی کو نہیں دیکھا انہوں نے ٹرپل پی ایچ ڈی کی ہوئی ہیں۔

سابق وزیراعظم کا کہنا تھا کہ بورس جانسن کو صرف کورونا ایس اوپیز پر عمل نہ کرنے پر استعفیٰ دینا پڑا، پاکستان میں 16 ارب لوٹنے والے کو وزیراعظم بنادیا گیا، نوازشریف، شہبازشریف بیٹھ کر طے کر رہے ہیں ملک کا نیا آرمی چیف کون ہوگا اس سے زیادہ ہمارے ملک کی کیا توہین ہوسکتی ہے، ایک فیکٹری پر چور بٹھا دیا جائے ، ملک کیسے چل سکتا ہے، یہ سمجھتے ہیں ڈرا، دھمکا کر چوروں کو تسلیم کرا لیں گے ایسا نہیں ہوگا، صحافیوں کے خلاف مقدمات بنائے گئے، شہبازگل کوبرہنہ کر کے تشدد کیا گیا، میرے خلاف دہشت گردی کا مقدمہ بنادیا گیا، جتنا مجھے دباؤگے اتنے ہی زورسے مقابلہ کرونگا۔

 

یہ بھی دیکھیں

پنجاب میں تعلیمی اداروں میں منشیات فروشی پر عمرقید کی سزا کیلئے قانون سازی

لاہور:چیئرمین پاکستان تحریک انصاف اور سابق وزیراعظم عمران خان ایک روزہ دورے پر لاہور ہیں، …