آئی اے ای اے ایرانی جوہری پروگرام کے بارے سیاسی رویہ اور دوہرے معیارات اپنانے سے باز رہے، امیر عبداللہیان

نیویارک: ایرانی وزیر خارجہ حسین امیر عبداللہیان نے اپنے دورہ نیویارک کے دوران ناروے کی وزیر خارجہ اینیکن ہیوٹفیلڈ کے ساتھ ملاقات کی ہے جس میں دوطرفہ تعلقات میں آنے والے حالیہ اتار چڑھاؤ سمیت تازہ ترین عالمی حالات پر بھی تبادلۂ خیال کیا گیا۔ ایرانی وزیر خارجہ نے تاکید کی کہ دوطرفہ رابطوں میں توسیع اور آپسی تعاون میں گہرائی کے لئے دونوں ممالک کی موجود مختلف استعدادات کو استعمال میں لانا چاہیئے۔

ایرانی وزیرخارجہ نے ایران پر عائد پابندیوں کے خاتمے کے لئے جاری مذاکرات کی جانب اشارہ کرتے ہوئے کہا کہ امریکہ کی جانب سے ضروری ارادے کی موجودگی کا ثبوت فراہم کئے جانے کی صورت میں معاہدہ حاصل ہو جائے گا۔

انہوں نے زور دیتے ہوئے کہا کہ عالمی جوہری توانائی ایجنسی کو اپنے تکنیکی وظائف و ذمہ داریوں کے مطابق عمل کرنا اور پرامن ایرانی جوہری معاہدے کے بارے سیاست بازی و دوہرے معیارات اپنانے سے پرہیز کرنا چاہیئے۔ اپنی گفتگو کے آخر میں انہوں نے دوطرفہ تعلقات کی توسیع سے متعلق متفقہ نقاط پر تاکید کی اور دونوں ممالک کے باہمی تعاون کی اہمیت پر زور دیا۔

دوسری جانب ناروے کی وزیر خارجہ اینیکن ہیوٹفیلڈ نے بھی دونوں ممالک کے باہمی تعلقات و دوطرفہ تعاون میں توسیع پر تاکید کی اور ایرانی جوہری معاہدے (JCPOA) کی جلد از جلد بحالی پر زور دیا۔