حکومت نے انتخابات کیلئے فوج اور رینجرز اہلکار دینے سے معذرت کرلی

لاہور:پنجاب اور خیبرپختونخوا اسمبلیوں کے عام انتخابات کے سلسلے میں پولنگ اسٹیشنز پر تعیناتی کے لئے حکومت نے فوج اور رینجرز اہلکار دینے سے معذرت کر لی۔وزارت داخلہ نے الیکشن کمیشن کو جی ایچ کیو کے جواب سے آگاہ کردیا ۔وزارت داخلہ کی جانب سے الیکشن کمیشن کو لکھے گئے خط میں پشاور بم دھماکے کا بھی تذکرہ کیا گیا ہے۔

وزارت داخلہ کے خط میں کہا گیا ہے کہ حالیہ دہشت گردی کے واقعات کے بعد سیکیورٹی صورتحال ٹھیک نہیں، سیکیورٹی فورسز دہشت گردی سے نمٹنے میں مصروف ہیں، آپریشن کے باعث سیکیورٹی اداروں کو کہیں اور لگانے کی گنجائش نہیں۔

خط میں کہا گیا ہے کہ دہشت گرد گروپ نے سیاسی جماعتوں کو کھلے عام حملوں کی دھمکیاں دیں، انتخابی مہم کے دوران دہشت گردی کے واقعات رونما ہونے کا خدشہ ہے، فوج کے اہلکار مردم شماری کے لئے بھی سیکیورٹی فراہم کریں گے۔

صوبائی عام انتخابات اورقومی اسمبلی کے 64حلقوں میں ضمنی الیکشن کے لئے فورسز کی فراہمی ممکن نہیں، صرف راجن پور ضمنی انتخاب کے لئے رینجرز بطور کوئیک رسپانس فورس دی جاسکتی ہے۔

خیال رہے کہ الیکشن کمیشن نے ضمنی اورصوبوں میں عام انتخابات کے لئے پاک فوج اوررینجرزکی تعیناتی کی درخواست کی تھی۔