فلسطین میں یہودی آباد کاری عالمی برادری کے لیے چیلنج ہے: حماس

مقبوضہ بیت المقدس:اسلامی تحریک مزاحمت "حماس” نے کہا ہےکہ اسرائیلی قابض حکام کی طرف سے فلسطینی علاقوں میں ہزاروں نئے آبادکاری یونٹس کی تعمیر کی منظوری بین الاقوامی قانون اور عالمی برادری کے لیے ایک کھلا چیلنج ہے۔

حماس کا کہنا ہے کہ قابض ریاست کی فلسطین میں توسیع پسندی اور آباد کاری کے خلاف ٹھوس موقف اختیار کرنےکی ضرورت ہے۔

حماس نےایک پریس بیان میں اس بات کی تصدیق کی ہے کہ قابض حکام کی جانب سے کل 3,000 سیٹلمنٹ یونٹس کی تعمیر کی منظوری اور کل مغربی کنارے اور مقبوضہ بیت المقدس کی بستیوں میں 4,000 نئے مکانات کی توثیق فلسطینیوں کے خلاف اسرائیلی جنگ کا تسلسل ہے۔

حماس نے مزید کہا کہ "یہ قانون اور بین الاقوامی برادری کے لیے ایک کھلا چیلنج اور اقوام متحدہ کی سلامتی کونسل کے سامنے بستیوں کی مذمت کرنے والی قرارداد کے مسودے پر ووٹ واپس لینے کی غلطی کا ایک اور ثبوت ہے۔”

حماس نے اس بات پر زور دیا کہ آبادکاری کے جرائم کے ساتھ قابض فوج کے تازہ ترین جرائم میں نابلس کا قتل عام ہے۔ قابض ریاست بربریت اور فسطائیت کا مظاہرہ کرتے ہوئے نہتے فلسطینیوں کا بے دریغ قتل عام کررہی ہے۔

حماس نے عالمی برادری سے مطالبہ کیا کہ وہ اسرائیل کی دہشت گردانہ پالیسیوں کو روکنے کے لیے اپنی ذمہ داری نبھائےکیونکہ اسرائیل کی ان پالیسیوں اور ظالمانہ اقدامات سے پورے خطے میں امن و سلامتی کو خطرہ ہے۔