عمران خان کے وکلا کو پولیس لائنز میں داخلے سے روک دیا گیا

اسلام آباد: چیئرمین پی ٹی آئی عمران خان کے وکلا کو پولیس لائنز میں داخلے سے روک دیا گیا ہے۔سابق وزیراعظم عمران خان کی لیگل ٹیم کو پولیس لائنز میں قائم عدالت میں جانے کی اجازت نہیں دی گئی، جس پر وکلا نے ہائی کورٹ سے رجوع کا فیصلہ کرلیا۔ فیصل چوہدری سمیت دیگر وکلا اسلام آباد ہائی کورٹ روانہ ہو گئے۔

دریں اثنا تحریک انصاف کے مرکزی رہنماؤں کو بھی پولیس لائنز جانے سے روک دیا گیا ہے۔ شاہ محمود، اسد عمر، وزیراعلیٰ گلگت بلتستان، علی اعوان سمیت دیگر کو پولیس لائنز جانے کی اجازت نہیں دی گئی۔ حکام کا کہنا ہے کہ صرف مجاز افراد کو پولیس لائنز میں داخلے کی اجازت ہے۔

واضح رہے کہ عمران خان کی گرفتاری کے خلاف آج وکلا کی جانب سے بھی جزوی ہڑتال کی جا رہی ہے۔ وکلا صرف اہم کیسز میں ماتحت عدالتوں میں پیش ہورہے ہیں ۔ آج مکمل ہڑتال کی کال لاہور بار نے دی تھی۔