Iblagh News | حقائق تک رسائی اور ان کا ابلاغ
سیالکوٹ:آرمی چیف جنرل عاصم منیر نے کہا ہے کہ شہداء مسلح افواج اورعوام کے لیے حوصلہ اور فخر کا باعث ہیں،منظم منصوبہ بندی کے تحت پیش آنے والے المناک واقعات کی دوبارہ اجازت نہیں دی جائے گی اور یوم سیاہ 9 مئی پر قوم کی توہین کرنیوالے تمام ذمہ داران کو ہرصورت انصاف کے کٹہرے میں لایا جائے گا۔ ۔ پاک فوج کے شعبہ تعلقات عامہ (آئی ایس پی آر) سے جاری بیان کے مطابق آرمی چیف جنرل عاصم منیر نے سیالکوٹ گیریژن کادورہ کیا،جہاں ان کا استقبال کمانڈر گوجرانوالہ نے استقبال کیا۔ آرمی چیف نے شہداء کی یادگار پرپھولوں کی چادر چڑھائی اوران کو شاندار خراجِ عقیدت پیش کیا ۔
آئی ایس پی آر کے مطابق آرمی چیف نے ماتحت فارمیشنز کی محنت، لگن، بلند حوصلے اور پیشہ ورانہ مہارت کو سراہا، اور فوج کی پیشہ ورانہ مہارت ، اندرونی و بیرونی چیلنجز بشمول پروپیگنڈہ وار فیئر سے نمٹنے کے لئے ہر طرح کی تیاری پر توجہ مرکوز رکھنے پر زور دیا۔
آئی ایس پی آرکے مطابق افسران اور جوانوں کے ساتھ بات چیت کے دوران آرمی چیف نے کہا کہ شہدا ء ہمارے ماتھے کا جُھومر ہیں جن سے آخرت میں اعلیٰ مقام کا وعدہ کیا گیا ہے ، پاکستانی عوام کے دلوں میں شہداء کا عظیم مقام ہمیشہ قائم رہے گا،ریاستِ پاکستان اور مسلح افواج تمام شہداء اور ان کے اہل خانہ کو ہمیشہ مقدم رکھتے ہیں اور مستقل طور پر ان کی عظیم قربانیوں کو انتہائی عزت و وقار کی نگاہ سے دیکھتے ہیں۔
آرمی چیف نے کہا کہ کسی کو بھی شہدا ء اور ان کی یادگاروں کی بے حرمتی کرنے کی ہر گز اجازت نہیں دی جائے گی،شہداء مسلح افواج، قانون نافذ کرنے والے اداروں، سرکاری اہلکاروں اور پاکستان کے عوام کے لیے حوصلہ اور فخر کا باعث ہیں۔
آرمی چیف نے اس بات پر زور دیا کہ حال ہی میں ایک منظم منصوبہ بندی کے تحت پیش آنے والے المناک واقعات کی دوبارہ کسی قیمت پر اجازت نہیں دی جائے گی۔
