اتھارٹی امریکی ،اسرائیلی شہ پر ہمیں دیوار سےلگا رہی ہے: اسلامی جہاد

مقبوضہ بیت المقدس:فلسطین کی مزاحمتی تنظیم اسلامی جہاد نے کل جمعہ کو اپنے 36 ویں تاسیس کے موقعے پر جاری ایک بیان میں فلسطینی اتھارٹی کی پالیسیوں کو کڑی تنقید کا نشانہ بنایا ہے۔

اسلامی جہاد نے الزام عاید کیا ہے کہ فلسطینی اتھارٹی امریکا اور اسرائیل کی خوش نودی کے لیے اسلامی جہاد کو دیوار سے لگانے کی پالیسی پر عمل پیرا ہے۔خیال رہے کہ کل جمعہ کی سہ پہراسلامی جہاد کے آغاز کے 36 ویں یوم تاسیس کی یاد میں غزہ، طولکرم، بیروت اور دمشق میں میلے کی سرگرمیاں شروع ہوئیں۔

یوم تاسیس کی تقریبات سے خطاب میں اسلامی جہاد کے رہ نما شہید طارق عزالدین کے بیٹے محمد عزالدین نے کہا کہ ہمیں آزادی کےلیے جاری عوامی مزاحمت سے روکا جا رہا ہے۔ ان کا کہنا تھا کہ ہم شہداء اور اسیران کے اہل خانہ کو تنہا نہیں چھوڑیں گے۔

فلسطین میں اسلامی جہاد تحریک کے قیدیوں کی سپریم لیڈرشپ کونسل نے مزاحمتی محور اور فلسطینی مزاحمت کاروں سے مطالبہ کیا ہے کہ وہ قیدیوں کو آزاد کرانے کے لیے سخت محنت کریں اور ان کی بیڑیاں توڑنے کے لیے ایک وقت مقرر کریں۔

36 ویں یوم تاسیس سے خطاب میں اسلامی جہاد کے سیکرٹری جنرل زیاد النخالہ نے کہا کہ فلسطینی اتھارٹی ہمیں امریکا اور اسرائیل کی خوش نودی کے لیے دیوار سے لگانے کی کوشش کررہی ہے۔

ان کا کہنا تھا کہ فلسطینی اتھارٹی امریکا اوراسرائیل کی شہ پر ہمارے کارکنوں کا تعاقب کررہی ہے۔انہیں گرفتار کرنے کے بعد حراستی مراکز مین انہیں تشدد کا نشانہ بنایا جاتا ہے۔

انہوں نے غرب اردن میں فلسطینی مزاحمت کو مزید تقویت دینے، مسجد اقصیٰ اور القدس کے تحفظ کے لیے ہر سطح پر کوششیں جاری رکھنے کی ضرورت پر زور دیا۔

زیاد النخالہ کا کہنا تھا کہ اسرائیل نے عالمی برادری کی آنکھوں کے سامنے غزہ کےلاکھوں لوگوں پر کئی سال سے ناکہ بندی مسلط کررکھی ہے۔